पुणे: पुणे जिल्ह्यात दूध भेसळीविरोधात अन्न व औषध प्रशासनाने (FDA) मोठी मोहीम राबवली आहे. दुधाची गुणवत्ता वाढवण्याच्या नावाखाली डिटर्जंट आणि नॉनिलफेनॉल इथॉक्सिलेटसारख्या रसायनांचा वापर होत असल्याचे तपासात समोर आले आहे. मंचर येथून या कारवाईला सुरुवात झाली असून आतापर्यंत 37 आरोपींची नावे समोर आली आहेत. त्यापैकी 25 जणांना अटक करण्यात आली आहे.
FDAने केवळ दूध तयार करणाऱ्या ठिकाणांवरच कारवाई न करता भेसळीशी संबंधित संपूर्ण यंत्रणेची तपासणी केली. भेसळीसाठी लागणाऱ्या पदार्थांचा पुरवठा, त्यांची वाहतूक, दूध संकलन केंद्रे, शीतकरण केंद्रे आणि दूध प्रक्रिया करणाऱ्या डेअऱ्यांपर्यंतची साखळी तपासण्यात आली.
मंचर येथील कारवाईदरम्यान व्हे पावडर, डिटर्जंट आणि दूधातील मिश्रण स्थिर ठेवण्यासाठी वापरले जाणारे पदार्थ जप्त करण्यात आले. आकाश डेअरी फार्ममधून घेतलेल्या 6 दूध नमुन्यांची तपासणी केली असता सर्व नमुन्यांमध्ये डिटर्जंट आढळल्याचे प्रशासनाने सांगितले.
या प्रकरणात भेसळयुक्त पदार्थांचे पुरवठादार, वाहतूकदार, दूध संकलन केंद्रांशी संबंधित व्यक्ती, शीतकरण केंद्रांचे संचालक आणि दुग्ध व्यवसायातील इतर व्यक्तींचा समावेश आहे. आतापर्यंत 26 अन्न आस्थापनांचे परवाने किंवा नोंदणी निलंबित करण्यात आली आहे. काही ठिकाणी व्यवसाय बंद करण्याचे निर्देशही देण्यात आले आहेत.
भोरामळा येथील नवकार डिस्ट्रिब्यूटर्स, मंचरमधील आकाश डेअरी फार्म, पिरसाई मिल्क अँड मिल्क पावडर, शिरवे येथील अर्थव मिल्क अँड मिल्क प्रॉडक्ट इंडस्ट्रीज आणि इंदापूरमधील सोनाई डेअरीसह इंदापूर व माळशिरस परिसरातील संस्थांवरही कारवाई करण्यात आली.
FDAच्या मते, दूध भेसळीशी संबंधित प्रत्येक स्तरावर जबाबदार व्यक्तीविरोधात कायदेशीर कारवाई केली जाणार आहे. “जनतेच्या आरोग्याशी खेळ खपवून घेतला जाणार नाही,” असा इशारा FDA आयुक्त तुकाराम मुंढे यांनी दिला.
