लोणी काळभोर, ता. 06 : पुणे–सोलापूर महामार्गावरील (Loni Kalbhor) कवडीपाठ टोलनाक्याजवळ भरधाव वेगाने येणाऱ्या ट्रकने कारला पाठीमागून जोरदार धडक दिल्याची घटना घडली. कदमवाकवस्ती (ता. हवेली) ग्रामपंचायत हद्दीतील काळभोर लॉन्ससमोरील दुभाजकाजवळ गुरुवारी (ता. 05) दुपारी साडेतीन वाजता हा अपघात झाला. या अपघातात कारचे मोठे नुकसान झाले असले तरी सुदैवाने कोणतीही जीवितहानी झाली नाही. याप्रकरणी ट्रकचालकावर लोणी काळभोर पोलीस ठाण्यात गुन्हा दाखल करण्यात आला आहे.
संदीप होले (पूर्ण नाव माहिती नाही वय -55, रा. बेटवाडी, ता. दौंड, जि. पुणे) असे गुन्हा दाखल करण्यात आलेल्या ट्रकचालकाचे नाव आहे. याप्रकरणी गणेश शिवाजीराव देशमुख (वय -37, रा. मिरावेत, डिस्ट्रीक फेज-1, प्लॅट डी-206, रावेत, जि.पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गणेश देशमुख हे पिंपरी चिंचवड अभियांत्रिकी महाविद्यालय, आकुर्डी येथे असिस्टंट प्रोफेसर म्हणून कार्यरत आहेत. ते त्यांच्या चारचाकी (एमएच 14 एमक्यू 7527) या कारने पीएचडीच्या शैक्षणिक कामानिमित्त दुपारी सुमारे दोन वाजता रावेत येथून एमआयटी कॉलेज, लोणी काळभोर कडे निघाले होते.
दरम्यान, दुपारी सुमारे साडेतीन वाजण्याच्या सुमारास ते कवडीपाठ टोलनाक्याच्या पुढे काळभोर लॉन्ससमोरील दुभाजकाजवळ आले असता समोरून मोटारसायकल येत असल्याने त्यांनी कारचा वेग कमी केला. त्याचवेळी पाठीमागून भरधाव वेगात आलेल्या ट्रकने (एमएच 16 टी 5286) देशमुख यांच्या कारला जोरदार धडक दिली.
या धडकेत कारची पाठीमागील काच फुटून डिकीचा भाग चेंबला असून वाहनाचे मोठे नुकसान झाले आहे. या अपघातात कोणीही जखमी झाले नसले तरी दोन्ही वाहनांचे नुकसान झाले. याप्रकरणी देशमुख यांनी दिलेल्या तक्रारीनुसार ट्रकचालक संदीप होले यांच्यावर लोणी काळभोर पोलीस ठाण्यात गुन्हा दाखल करण्यात आला आहे. तपास लोणी काळभोर पोलीस करीत आहेत.
