प्रतिनिधी अमित मुंडीक
पिंपरी-चिंचवड: शेअर बाजारात गुंतवणुकीवर दरमहा 10 ते 20 टक्के नफ्याचे आमिष दाखवून तिघांची सुमारे 9 लाख 50 हजार रुपयांची फसवणूक केल्याचा प्रकार नवी सांगवी (Pimpri-Chinchwad) येथे उघडकीस आला आहे. याप्रकरणी सांगवी पोलीस ठाण्यात गुन्हा दाखल करण्यात आला असून मुख्य आरोपी अद्याप फरार आहे.
पोलिसांनी दिलेल्या माहितीनुसार, ही फसवणूक 8 एप्रिल 2023 ते 4 मार्च 2026 या कालावधीत नवी सांगवीतील समर्थनगर येथील ‘गणेश पॅलेस’मध्ये घडली. या प्रकरणी प्रतीक संजय तोडमल (वय 29, रा. नवी सांगवी) यांनी फिर्याद दिली आहे. फिर्यादीच्या तक्रारीनुसार, प्रवीण विठ्ठल काटकर (वय 33) याने फिर्यादीसह दीपक लोंढे आणि अक्षय सुतार यांना शेअर बाजाराशी संबंधित “पी. के. प्रॉफिट ट्रेडिंग” या कंपनीत गुंतवणूक करण्यास प्रवृत्त केले.
गुंतवणूक केल्यास दरमहा 10 ते 20 टक्के नफा आणि एक वर्षानंतर मूळ रक्कम परत देण्याचे आमिष आरोपीने दाखवले होते. यासाठी त्याने तिघांशी लेखी करारही केला होता. आरोपीने फिर्यादी तोडमल यांच्याकडून 2 लाख 50 हजार रुपये, दीपक लोंढे यांच्याकडून 5 लाख रुपये आणि अक्षय सुतार यांच्याकडून 2 लाख रुपये अशी एकूण 9 लाख 50 हजार रुपयांची (तक्रारीतील 11 लाखांच्या दाव्याची पडताळणी सुरू आहे) गुंतवणूक करून घेतली. मात्र, मुदत संपल्यानंतर नफा किंवा मूळ रक्कम परत न करता आरोपीने त्यांची आर्थिक फसवणूक केली.
या प्रकरणी सांगवी पोलीस ठाण्यात गुन्हा क्रमांक 109/2026 नुसार भारतीय न्याय संहिता (BNS) कलम 316 (2) आणि 318 (4) अन्वये गुन्हा दाखल करण्यात आला आहे. आरोपी अद्याप फरार असून सहाय्यक पोलीस निरीक्षक पाटील या प्रकरणाचा अधिक तपास करीत आहेत.
