भिगवण: सुमारे पंचवीस हजारांच्या आसपास लोकसंख्या असलेल्या भिगवणसारख्या वाढत्या गावात आजही सुसज्ज क्रीडांगणाचा अभाव असल्याने तरुणाईसमोर मोठा प्रश्न उभा ठाकला आहे. गावाच्या विकासाच्या दृष्टीने विविध कामे होत असताना क्रीडा सुविधांकडे मात्र दुर्लक्ष होत असल्याचे चित्र समोर येत आहे.
सध्या गावात उपलब्ध असलेले क्रीडांगण अतिक्रमणाच्या विळख्यात सापडले असून, जागाही अपुरी पडत आहे. त्यामुळे खेळाडूंना नियमित सरावासाठी आवश्यक सुविधा मिळत नाहीत. काही वर्षांपूर्वी भिगवणमध्ये मोठ्या प्रमाणावर क्रिकेट स्पर्धा भरविल्या जात होत्या. यासाठी कृषी उत्पन्न बाजार समिती, इंदापूरच्या उपबाजारातील जागेचा वापर केला जात होता. मात्र बाजार समितीच्या विस्तारामुळे ही जागा खेळांसाठी उपलब्ध राहिलेली नाही.
क्रीडांगण हे केवळ खेळाचे ठिकाण नसून, ते तरुणांच्या सर्वांगीण विकासाचे केंद्र असते. खेळामुळे शारीरिक व मानसिक आरोग्य सुधारते, संघभावना आणि नेतृत्वगुण विकसित होतात. मात्र मैदानाच्या अभावामुळे भिगवणमधील अनेक होतकरू खेळाडू संधीपासून वंचित राहत असल्याची खंत व्यक्त केली जात आहे. परिणामी, तरुणाई मैदानी खेळांपासून दूर जाऊन मोबाईल व आभासी जगात गुंतत असल्याचेही वास्तव समोर येत आहे.
दरम्यान, भिगवणसाठी भव्य क्रीडांगण उभारण्यासाठी शासन स्तरावर पाठपुरावा करण्याची मागणी आता जोर धरू लागली आहे. भिगवण हे पुनर्वसित गाव असल्यामुळे गायरान जागेचा अभाव आहे. त्यामुळे वनखात्याची जागा उपलब्ध करून देण्याची मागणी पुढे येत आहे. स्थानिक पातळीवर तसेच लोकप्रतिनिधींच्या माध्यमातून या प्रश्नाला गती देण्याची अपेक्षा व्यक्त होत आहे.
एकूणच, भिगवणच्या विकासाच्या दृष्टीने सुसज्ज क्रीडांगण ही अत्यावश्यक गरज बनली असून, यावर तातडीने निर्णय होणे आवश्यक आहे. अन्यथा गावातील तरुणाईच्या क्रीडा स्वप्नांना मर्यादा येण्याची भीती व्यक्त केली जात आहे.
“भिगवण गावासाठी भव्य क्रीडांगण उभारणे ही काळाची गरज आहे. यासाठी महाराष्ट्र राज्याचे कृषिमंत्री दत्तात्रय भरणे यांच्याकडे लवकरच जागेची मागणी करण्यात येणार आहे.
भिगवण हे पुनर्वसित गाव असल्यामुळे गायरान जागा उपलब्ध नाही. त्यामुळे वन विभागाची (फॉरेस्ट) जागा मिळाल्यास तरुणांसाठी मोठ्या प्रमाणात सुसज्ज क्रीडांगण उभारणे शक्य होईल.”
— पराग जाधव
माजी सरपंच, भिगवण“भिगवणच्या क्रीडांगणाचा विषय अत्यंत महत्त्वाचा असून, यावर आम्ही सातत्याने चर्चा करत आहोत. वार्ड क्रमांक ४ मधील सध्याच्या जागेवरील अतिक्रमणाचा प्रश्न ग्रामपंचायतीमार्फत मोजणी करून मार्गी लावण्याचा प्रयत्न करू.
तसेच नवीन गायरान किंवा वनखात्याची जागा मिळवण्यासाठी दत्तात्रय भरणे, सुप्रिया सुळे आणि सुनेत्रा पवार यांच्या माध्यमातून शासकीय पाठपुरावा करून सुमारे ५ ते ६ एकर जागा क्रीडांगणासाठी मिळविण्याचा प्रयत्न करू.”
— सचिन बोगावत
सामाजिक कार्यकर्ते, भिगवण
