लोणी काळभोर, (पुणे) : पूर्व हवेलीतील नामांकित लोणी काळभोर (Loni Kalbhor News) ग्रामपंचायतीच्या सरपंचपदी नागेश अंकुश काळभोर यांची बुधवारी (ता. 29) बिनविरोध झाली आहे. यापूर्वीचे सरपंच राहुल दत्तात्रय काळभोर यांनी आपल्या पदाचा राजीनामा दिल्याने निवडणूक निर्णय अधिकारी संदीप झिंगाडे यांच्या अध्यक्षतेखाली सरपंच पदाची निवडणूक घेण्यात आली. तर लोणी काळभोरचे मंडलाधिकारी लक्ष्मण बांडे, ग्रामविकास अधिकारी सतीश गवारी यांनी निवडणुकीचे कामकाज पाहिले.
सरपंच पदासाठी नागेश काळभोर यांचा एकमेव अर्ज आल्याने निवडणूक निर्णय अधिकारी संदीप झिंगाडे यांनी नागेश काळभोर यांची सरपंचपदी बिनविरोध निवड झाल्याची घोषणा केली. नागेश काळभोर यांची बिनविरोध निवड होताच कार्यकर्त्यांनी गुलाल व फटाक्यांच्या अतिषबाजी करत मोठा जल्लोष केला.
यावेळी महाराष्ट्र केसरी राहुल काळभोर, बाजार समितीचे संचालक प्रशांत काळभोर, माजी सरपंच राजाराम काळभोर, सविता लांडगे, आण्णासाहेब काळभोर, बापू बोरकर, राजेंद्र काळभोर, बाळासाहेब काळभोर, संजय गायकवाड, सविता जगताप, सामाजिक कार्यकर्ते सचिन काळभोर, राष्ट्रवादीचे कार्याध्यक्ष युवराज काळभोर, गणेश कांबळे, आदि सदस्य व मान्यवर उपस्थित होते.
मागील सरपंच पदाच्या निवडणुकीत नागेश काळभोर यांचा एका मताने पराभव झाला होता. सत्ताधारी गटाचे एक मत फुटल्याचे निष्पन्न झाले होते. त्यामुळे ग्रामपंचायतीमध्ये सत्ताधारी गटाला मिळालेली सत्ता गमवावी लागली होती. विरोधी स्पर्धक राहुल काळभोर यांची सरपंचपदी 9 विरुद्ध 8 मतांनी विजय झाला होता.
दरम्यान, आज नागेश काळभोर यांचा वाढदिवस व त्यांना या वाढदिवसानिमित्त सत्ताधारी व विरोधकांनी मोठे गिफ्ट दिले आहे. त्यामुळे वाढदिवस व आज मिळालेले सरपंचपद हा दुग्धशर्करा योग जुळून आल्याने नागेश काळभोर यांच्यासह परिसरातील नागरिक आनंदात आहेत.
