उरुळी कांचन, ता. 9 : जिल्हा परिषद गट व पंचायत (Koregaon) समिती गणाच्या 2026 च्या निवडणुकीचा निकाल सोमवारी (ता. 9) जाहीर जाहीर झाला. कोरेगाव मूळ केसनंद गटात राष्ट्रवादी काँग्रेसने आपले निर्विवाद वर्चस्व सिद्ध केले. कोरेगाव मूळ जिल्हा परिषद गटातून राष्ट्रवादीच्या सुरेखा हरगुडे यांनी मोठ्या मताधिक्याने विजय मिळवला, तर कोरेगाव मूळ पंचायत समिती गणातून कृषिराज उर्फ मनोज चौधरी यांनी अवघ्या चार मतांच्या फरकाने थरारक विजय खेचून आणला. दरम्यान, केसनंद पंचायत समिती गणातून भाजपचे कुशाल सातव विजय संपादन करत भाजपचे खाते उघडले.
कोरेगाव मूळ गट व गणात राष्ट्रवादीने प्रचंड मताधिक्याने बाजी मारत विरोधकांचा सपशेल पराभव केला. मतमोजणीच्या प्रत्येक फेरीत राष्ट्रवादीची आघाडी वाढत गेल्याने कार्यकर्त्यांमध्ये उत्साह संचारला. निकाल जाहीर होताच परिसरात जल्लोष साजरा करण्यात आला.
विशेष लक्ष वेधून घेतले ते कोरेगाव मूळ पंचायत समिती गणातील अटीतटीच्या लढतीने. राष्ट्रवादीचे अधिकृत उमेदवार कृषिराज उर्फ मनोज चौधरी यांनी शेवटपर्यंत संयम राखत मतदारांचा विश्वास संपादन केला. त्यांनी भाजपचे उमेदवार सुरज भालचंद्र चौधरी यांचा अवघ्या चार मतांनी पराभव केला. कृषिराज चौधरी यांना एकूण 5,541 मते मिळाली, तर सुरज चौधरी यांना 5,537 मते मिळाली. टपाली मतांमध्ये कृषिराज चौधरी यांना दोन मते मिळाली, दुसरीकडे सुरज चौधरी यांना एकही मत मिळाले नाही.
या निवडणुकीत कोणतेही मोठे राजकीय पाठबळ नसतानाही सुरज चौधरी यांनी सामान्य मतदारांच्या जीवावर एकाकी झुंज देत प्रभावी लढत दिली. मात्र, शेवटच्या क्षणी राष्ट्रवादीच्या संघटनात्मक ताकदीपुढे त्यांना पराभव स्वीकारावा लागला. मनोज चौधरी यांच्या विजयात माजी पंचायत समिती सदस्य दत्तात्रय उर्फ बाळाअप्पा चौधरी यांची भूमिका महत्वाची ठरली.
दरम्यान, केसनंद गणातून भाजपचे कुशाल सातव यांनी अटीतटीच्या लढतीत विजय मिळवत भाजपचे खाते उघडले. तरीही एकूण निकाल पाहता कोरेगाव मूळ परिसरात राष्ट्रवादीची पकड अधिक भक्कम झाल्याचे स्पष्ट झाले आहे. हा विजय केवळ आकड्यांचा नसून जनतेच्या विश्वासाचा असल्याचे मानले जात आहे. विकासाच्या मुद्द्यावर मतदारांनी राष्ट्रवादीला स्पष्ट कौल दिला असून, या निकालामुळे स्थानिक राजकारणात नवे समीकरण आकारास येणार असल्याचे चित्र दिसून येत आहे.
उमेदवार (कंसात मिळालेले मते)
1)कोरेगाव मूळ – केसनंद जिल्हा परिषद गट
राष्ट्रवादी : सुरेखा रमेश हरगुडे (18872)
भाजप : कविता विजय पायगुडे (9838)
नोटा : 261
2) केसनंद पंचायत समिती गण
राष्ट्रवादी : प्रमोद चंद्रकांत हरगुडे (6377)
भाजप : कुशाल गोरख सातव (10814)
मनसे : धर्मेंद्र महादेव गावडे (230)
नोटा :
3) कोरेगाव मूळ पंचायत समिती गण
राष्ट्रवादी : कृषिराज उर्फ मनोज दत्तात्रय चौधरी (5541)
भाजप : सूरज चौधरी (5537)
अपक्ष : प्रीतम चंद्रकांत शितोळे (235)
नोटा : (98)
