पुणे: खेड तालुक्यातील (Khed News) एका कंपनीत किरकोळ वादातून हिंसाचारापर्यंत (Pune Crime) पोहोचलेली धक्कादायक घटना समोर आली आहे. कंपनीच्या व्हॉट्सअॅप ग्रुपवर फोटो शेअर केल्याच्या कारणावरून एका कर्मचाऱ्यावर लोखंडी रॉडने जीवघेणा हल्ला करण्यात आला. या प्रकरणी खेड पोलिस ठाण्यात गुन्हा दाखल करण्यात आला आहे. (Latest Marathi News)
विशाल हिरामण तोत्रे (मूळ रा. वडगाव पाटोळे, सध्या रा. राक्षेवाडी, ता. खेड) असे जखमी कर्मचाऱ्याचे नाव असून अक्षय भगवान भांबुरे (रा. ढोरे भांबुरवाडी, ता. खेड) याच्याविरुद्ध गुन्हा नोंदविण्यात आला आहे. प्राथमिक माहितीनुसार, कंपनीत मोबाईल फोन वापरावरून काही दिवसांपासून वाद सुरू होता. तोत्रे यांनी संबंधित प्रकाराची माहिती कंपनीच्या एचआर व्यवस्थापकाला दिली होती. तसेच कंपनीच्या अधिकृत व्हॉट्सअॅप ग्रुपवर काही फोटो शेअर केले होते. या घटनेमुळे आरोपी संतप्त झाला होता.
घटनादिवशी आरोपीने तोत्रे यांना अडवून लोखंडी रॉडने त्यांच्या डोक्यावर आणि हाताच्या कोपरावर वार केले. अचानक झालेल्या या हल्ल्यात तोत्रे गंभीर जखमी झाले असून त्यांच्यावर रुग्णालयात उपचार सुरू आहेत. हल्ल्यानंतर आरोपीने पुढे तक्रार केल्यास जीवे मारण्याची धमकी दिल्याचे फिर्यादीने नमूद केले आहे. या घटनेनंतर ऑफिसमध्ये भीतीचे वातावरण निर्माण झाले असून पोलिस पुढील तपास करत आहेत.
