धुळे: धुळे जिल्ह्यातील साक्री तालुक्यातील कासारे (Shocking News) गावात आनंदाच्या उंबरठ्यावर उभ्या असलेल्या एका कुटुंबावर दु:खाचा डोंगर कोसळला. लग्नाच्या आदल्या दिवशी नवरदेवाचा विजेचा धक्का लागून मृत्यू झाल्याची हृदयद्रावक घटना घडली. धनु बाजीराव माळचे या तरुणाचे 25 फेब्रुवारी रोजी लग्न होणार होते. मात्र तयारी सुरू (Dhule News) असतानाच नियतीने घाला घातला.
घरात लग्नाची लगबग सुरू होती. नातेवाईक, मित्रमंडळी आणि कुटुंबीय तयारीत गुंतले होते. अशातच धनु घराची साफसफाई करत असताना अचानक त्याला विजेचा तीव्र धक्का बसला. धक्क्याने तो खाली कोसळला. कुटुंबीयांनी तातडीने त्याला साक्री येथील ग्रामीण रुग्णालयात हलवले. मात्र डॉक्टरांनी तपासणी करून त्याला मृत घोषित केले. काही तासांपूर्वी ज्याच्या लग्नासाठी सजावट सुरू होती, त्या घरात क्षणात शोककळा पसरली.
धनु हा कुटुंबातील एकुलता एक मुलगा होता. आईवडिलांचा आधार, बहिणींचा लाडका भाऊ आणि गावातील तरुणांमध्ये मिसळून राहणारा उमदा युवक अशी त्याची ओळख होती. क्रिकेटची विशेष आवड आणि मेहनती स्वभावामुळे तो गावात लोकप्रिय होता. लग्नाच्या आदल्या दिवशीच त्याचा मृत्यू झाल्याने संपूर्ण गाव स्तब्ध झाले. दुपारी कासारे येथे शोकाकुल वातावरणात त्याच्यावर अंत्यसंस्कार करण्यात आले. अनेकांच्या डोळ्यांतून अश्रू अनावर झाले. आनंदाच्या क्षणात आलेल्या या दुर्दैवी घटनेने कासारे गावावर शोककळा पसरली असून, एक तरुण स्वप्नांसह निघून गेल्याची हळहळ सर्वत्र व्यक्त होत आहे.
