फुरसुंगी, ता. 17 : फुरसुंगी बाजार परिसरात सुरू असलेल्या कथित मटका जुगारावर काळेपडळ पोलिसांच्या तपास पथकाने छापा टाकून दोघांना ताब्यात घेतले. या कारवाईत दोन मोबाईल फोन, रोख रक्कम आणि युनिकॉर्न मोटारसायकल असा एकूण 65 हजार 300 रुपयांचा मुद्देमाल जप्त करण्यात आला आहे. ही कारवाई बुधवारी (ता. 16) दुपारी सव्वादोनच्या सुमारास करण्यात आली.
गोविंद अनंतराव वेदपाठक (वय 39, रा. सासवड, ता. पुरंदर) आणि राजू बाबुलाल यादव (वय 23, रा. फुरसुंगी) अशी ताब्यात घेण्यात आलेल्या दोघांची नावे आहेत. याप्रकरणी अजित सुभाष पवार (रा. फुरसुंगी) याच्यासह तिघांविरुद्ध महाराष्ट्र जुगार प्रतिबंधक अधिनियमातील कलम 12 (अ) तसेच भारतीय न्याय संहिता कलम 3(5) अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, फुरसुंगी परिसरात मटका जुगार सुरू असल्याची माहिती पोलिसांना मिळाली होती. त्यानुसार वरिष्ठ पोलिस निरीक्षक गिरीषा निंबाळकर यांच्या मार्गदर्शनाखाली तपास पथकाने पंचांसह फुरसुंगी बाजार परिसरात पाहणी केली. त्यावेळी एका इसमाकडून मटका जुगाराचे आकडे मोबाईलमध्ये टाईप करून घेतले जात असल्याचे पोलिसांच्या निदर्शनास आले.
पोलिसांनी तत्काळ छापा टाकून गोविंद वेदपाठक आणि राजू यादव यांना ताब्यात घेतले. चौकशीदरम्यान वेदपाठक याने अजित पवार यांच्या सांगण्यावरून ‘कल्याण बाजार’ नावाचा मटका घेत असल्याचे सांगितल्याचे पोलिसांनी नमूद केले आहे. तर राजू यादव हा मटका खेळण्यासाठी आल्याचे सांगितल्याचेही तक्रारीत नमूद आहे.
पोलिसांनी दोघांची झडती घेतली असता त्यांच्याकडून दोन मोबाईल फोन आणि 300 रुपये रोख रक्कम मिळून आली. वेदपाठक याच्या मोबाईलमधील व्हॉट्सॲप संभाषण तपासले असता अजित पवार यांच्या मोबाईल क्रमांकावर जुगाराचे आकडे, रक्कम आणि पावत्या पाठविल्याचे आढळल्याचे पोलिसांनी सांगितले.
या कारवाईत सुमारे 15 हजार रुपये किमतीचे दोन मोबाईल फोन, 300 रुपये रोख आणि 50 हजार रुपये किमतीची युनिकॉर्न मोटारसायकल असा एकूण 65 हजार 300 रुपयांचा मुद्देमाल जप्त करण्यात आला. जप्ती पंचनामा करून कारवाईची व्हिडिओग्राफी ई-साक्ष ॲपमध्ये करण्यात आल्याचे पोलिसांनी नमूद केले आहे. याप्रकरणी पुढील तपास पोलिस करीत आहेत.
