पुणे : पुणे शहर म्हटलं की अनेकांच्या मनात सर्वात आधी येणारी ओळख म्हणजे ‘MH 12’ हा वाहन नोंदणी क्रमांक. मात्र वाहनांची संख्या मोठ्या प्रमाणात वाढल्यामुळे ही मालिका संपण्याच्या मार्गावर आली होती. त्यामुळे पुण्याचा आरटीओ कोड बदलला जाणार का, याबाबत शहरात चिंता निर्माण झाली होती. आता या विषयावर सकारात्मक चित्र निर्माण झाले आहे.
पुणे प्रादेशिक परिवहन कार्यालयात दरवर्षी मोठ्या प्रमाणात नवीन वाहनांची नोंदणी होते. वाढत्या वाहनसंख्येमुळे ‘MH 12’ अंतर्गत उपलब्ध असलेल्या नंबर प्लेटच्या मालिका कमी पडत आहेत. त्यामुळे नवीन क्रमांक प्रणाली लागू करण्याचा विचार सुरू होता. यामुळे पुणेकरांच्या भावना दुखावल्या गेल्या होत्या, कारण ‘MH 12’ ही केवळ नंबर प्लेट नसून शहराची एक वेगळी ओळख मानली जाते.
सध्या पुणे आरटीओकडून दुचाकी वाहनांसाठी ‘ZY’ आणि चारचाकी वाहनांसाठी ‘ZW’ ही मालिका वापरली जात आहे. पुढे ‘ZZ’ ही मालिका पूर्ण झाल्यानंतर दोन अक्षरांच्या सध्याच्या पर्यायांचा शेवट होणार आहे. त्यामुळे नवीन पर्याय शोधण्याची गरज निर्माण झाली होती.
या प्रकरणी पुण्याचे खासदार आणि केंद्रीय नागरी विमान वाहतूक राज्यमंत्री मुरलीधर मोहोळ यांनी केंद्र सरकारकडे पाठपुरावा केला. त्यांनी केंद्रीय रस्ते परिवहन मंत्री नितीन गडकरी यांची भेट घेऊन पुणेकरांची भावना मांडली. ‘MH 12’ हा कोड कोणत्याही परिस्थितीत बदलू नये आणि याच ओळखीअंतर्गत पुढील नंबर मालिका उपलब्ध करून द्यावी, अशी मागणी त्यांनी केली.
नितीन गडकरी यांनी या मागणीला अनुकूल प्रतिसाद दिला आहे. पुणेकरांसाठी ‘MH 12’चे असलेले महत्त्व लक्षात घेऊन ही ओळख कायम ठेवण्यासाठी आवश्यक प्रक्रिया करण्याच्या सूचना दिल्या जातील, असे त्यांनी स्पष्ट केले.
या निर्णयामुळे पुणेकरांना मोठा दिलासा मिळाला असून, भविष्यातही वाहनांवर ‘MH 12’ ही पुण्याची खास ओळख कायम राहण्याची शक्यता आहे.
