लोणी काळभोर, ता. ६ : लग्नात माहेरच्यांनी २५ लाख रुपये खर्च करूनही सासरच्या मंडळींकडून पैशांसाठी छळ करण्यात आल्याचा धक्कादायक प्रकार समोर आला आहे. विवाहितेच्या स्त्रीत्वावर संशय घेत तिला अपमानित करणे, मारहाण करणे, माहेरून १० लाख रुपये आणण्याचा तगादा लावणे, तसेच गर्भपात करण्यास भाग पाडल्याचा गंभीर आरोप पीडित विवाहितेने केला आहे. एवढेच नव्हे, तर घटस्फोटासाठी ७० लाख रुपये देण्याचे आश्वासन देऊन त्यापैकी २१ लाख रुपये दिल्यानंतर पतीने घटस्फोट होण्यापूर्वीच दुसरे लग्न केल्याचा आरोपही तक्रारीत करण्यात आला आहे.
याप्रकरणी वडकी (ता. हवेली) येथिल 24 वर्षीय विवाहितेने पती ऋषिकेश अभिमान वायबसे, सासू रुक्मिणी वायबसे, सासरे अभिमान वायबसे, नणंद विद्या बिक्कड, दीर श्रीकांत वायबसे आणि विवाह जमविणारे मध्यस्थ वालचंद मुंडे यांच्याविरोधात फुरसुंगी पोलीस ठाण्यात तक्रार दिली आहे. पोलिसांनी दिलेल्या माहितीनुसार, फिर्यादी यांचा विवाह ६ जून २०२५ रोजी लातूर येथील ऋषिकेश वायबसे यांच्याशी झाला होता. विवाहावेळी त्यांच्या आई-वडिलांनी १५ लाख रुपये वरदक्षिणा, एक तोळ्याची सोन्याची अंगठी, तसेच लग्नाचे साहित्य व खर्चासाठी १० लाख रुपये असा एकूण २५ लाख रुपयांचा खर्च केल्याचे तक्रारीत म्हटले आहे. लग्नानंतर सुरुवातीचा एक महिना चांगला गेल्यानंतर सासू व नणंद यांनी माहेरच्या आर्थिक परिस्थितीवरून टोमणे मारण्यास सुरुवात केली. लग्नात अपेक्षेप्रमाणे मानपान केला नसल्याचे सांगून वारंवार अपमानित केले जात असल्याचा आरोप आहे.
दरम्यान, पतीच्या प्रिंटिंग व्यवसायासाठी माहेरून १० लाख रुपये आणण्याची मागणी करण्यात आली. पैसे देण्यास असमर्थता दर्शविल्यानंतर पती व सासऱ्यांच्या सांगण्यावरून मारहाण आणि शिवीगाळ करण्यात आल्याचेही तक्रारीत नमूद आहे. नणंदेने फिर्यादी यांच्या स्त्रीत्वाबाबत संशय व्यक्त करून डॉक्टरांकडे तपासणीसाठी नेल्याचा तसेच त्या महिला नसल्याचे आरोप करून मानसिक छळ केल्याचा दावा करण्यात आला आहे.
ऑक्टोबर २०२५ मध्ये तेजश्री गर्भवती असल्याचे समजल्यानंतरही सासरच्या मंडळींनी त्यांना मूल होऊ देणार नसल्याचे सांगून घराबाहेर काढल्याचा आरोप आहे. ६ डिसेंबर २०२५ रोजी त्यांचे दागिने काढून घेत घरातून हाकलून दिल्याचे तक्रारीत म्हटले आहे. त्यानंतर माहेरच्या मंडळींनी केलेल्या वैद्यकीय तपासणीत तेजश्री या महिला असून तीन महिन्यांच्या गर्भवती असल्याचे स्पष्ट झाल्याचा दावा करण्यात आला आहे.
पुढे घटस्फोट घेण्याच्या बदल्यात ७० लाख रुपये देण्याचे आश्वासन देण्यात आले. त्यापूर्वी गर्भपात करण्याची अट घालण्यात आली आणि हडपसर येथील रुग्णालयात गर्भपात करण्यात आल्याचे तक्रारीत म्हटले आहे. २२ जुलै २०२६ रोजी घटस्फोटाच्या बाँडवर स्वाक्षरी घेतल्यानंतर त्यांच्या बँक ऑफ महाराष्ट्रच्या खात्यावर २१ लाख रुपये जमा करण्यात आले. मात्र, त्यानंतर पतीने घटस्फोटाची प्रक्रिया पूर्ण होण्यापूर्वीच दुसरे लग्न केल्याचे फिर्यादी यांच्या निदर्शनास आले. याबाबत जाब विचारला असता उर्वरित ४९ लाख रुपये देणार नसल्याची धमकी देण्यात आल्याचा आरोपही त्यांनी केला आहे.
या संपूर्ण प्रकरणात विवाहापासून ते आजपर्यंत हुंड्याची मागणी, शारीरिक व मानसिक छळ, स्त्रीत्वाबाबत अपमानास्पद आरोप, गर्भपातासाठी दबाव आणि घटस्फोटासाठी धमकावल्याचे गंभीर आरोप करण्यात आले आहेत. याप्रकरणी फुरसुंगी पोलीस ठाण्यात सासरच्या मंडळींच्या विरोधात भारतीय न्याय संहिता (बी एन एस), 2023 – 115(2),3(5),351(2),352,85 प्रमाणे गुन्हा दाखल करण्यात आला आहे.
