लोणी काळभोर, ता. १० : नागरिकांच्या आरोग्याची काळजी घेत सामाजिक बांधिलकी जपणाऱ्या पोलीस मित्र संघाच्या वतीने लोणी काळभोर (ता. हवेली) येथे रविवारी (ता. ९) मोफत आरोग्य तपासणी शिबिराचे आयोजन करण्यात आले. या शिबिराला परिसरातील नागरिकांचा उत्स्फूर्त प्रतिसाद मिळाला. तब्बल १०० ते १२५ कुटुंबांनी या शिबिराचा लाभ घेत विविध आरोग्य तपासण्या करून घेतल्या.
या शिबिराला हवेली पंचायत समितीचे उपसभापती युगंधर उर्फ सनी काळभोर, लोणी काळभोरचे प्रशासक तथा सरपंच नागेश काळभोर, माजी सरपंच माधुरी काळभोर, माजी उपसरपंच राजेंद्र काळभोर आणि कदमवाकवस्तीच्या पोलीस पाटील प्रियांका भिसे यांनी भेट देऊन उपक्रमाचे कौतुक केले. शिबिरामध्ये नागरिकांची उंची, वजन, बीएमआय (BMI), दंत तपासणी यासह विविध प्राथमिक आरोग्य तपासण्या करण्यात आल्या. तसेच स्त्रीरोग तज्ज्ञांचे मार्गदर्शनपर व्याख्यान आयोजित करण्यात आले. तज्ज्ञ डॉक्टरांनी नागरिकांच्या आरोग्यविषयक समस्या जाणून घेत आवश्यक मार्गदर्शन केले.
‘आजार अंगावर काढण्यापेक्षा वेळोवेळी आरोग्य तपासणी करून घेणे आवश्यक आहे,’ असा संदेश देत डॉक्टरांनी नागरिकांना नियमित आरोग्य तपासणीचे महत्त्व पटवून दिले. ग्रामीण व निमशहरी भागातील नागरिकांना आरोग्यसेवा सहज उपलब्ध व्हावी, तसेच आर्थिकदृष्ट्या गरजू नागरिकांना मोफत आरोग्य तपासणीचा लाभ मिळावा, या उद्देशाने शिबिराचे आयोजन करण्यात आल्याचे पोलीस मित्र संघाचे पुणे जिल्हा कार्याध्यक्ष श्रीरंग लोखंडे यांनी सांगितले.
दरम्यान, या उपक्रमाच्या माध्यमातून पोलीस मित्र संघाने सामाजिक बांधिलकी जपत नागरिकांच्या आरोग्याबाबत जनजागृती करण्याचा प्रयत्न केला. शिबिराच्या आयोजनासाठी पोलीस मित्र संघाचे पदाधिकारी व कार्यकर्ते, विश्वराज हॉस्पिटलचे वैद्यकीय पथक तसेच अंबर विलास सोसायटीच्या सदस्यांचे सहकार्य लाभले.
शिबिराच्या यशस्वी आयोजनासाठी पोलीस मित्र संघाचे सचिव सुमंत लोखंडे यांनी विशेष प्रयत्न केले. तसेच म्हस्कुजी पिंगळे, सचिन मखर, हरिदास कोंडे, पवन खांबेकर आणि किशोर सानप यांनी सहकार्य केले. नागरिकांची आरोग्य तपासणी करून त्यांना तज्ज्ञांकडून आरोग्यविषयक मार्गदर्शन केल्याबद्दल विश्वराज हॉस्पिटलच्या डॉ. दीपली गायकवाड, डॉ. मेनका जाधव, डॉ. गौरी नागरे, सौ. स्वाती वाघमारे, सुरेश शितोळे, किरण साळवे आणि विपुल शिंदे यांचे विशेष आभार मानण्यात आले.
