मुंबई: मुंबईतील वांद्रे-कुर्ला संकुलात (BKC) सुरू असलेल्या ‘ग्लोबल फिनटेक फेस्ट 2026’च्या उद्घाटनावेळी सुरक्षा यंत्रणांना सतर्क करणारी घटना घडली. पंतप्रधान नरेंद्र मोदी यांच्या उपस्थितीत होणाऱ्या या महत्त्वाच्या कार्यक्रमात स्वतःला पंतप्रधान कार्यालयातील (PMO) अधिकारी असल्याचे सांगत प्रवेश करण्याचा प्रयत्न करणाऱ्या दोघांना पोलिसांनी ताब्यात घेतले.
या प्रकरणाचा तपास मुंबई पोलिसांच्या गुन्हे शाखेकडून सुरू असून, तपासात धक्कादायक माहिती समोर आली आहे. पोलिसांनी ताब्यात घेतलेल्या 24 वर्षीय रोहन पारेख याच्याकडे PMOचे बनावट ओळखपत्र सापडल्याचे समोर आले. त्यामुळे त्याने हे ओळखपत्र नेमके कशासाठी तयार केले होते आणि कार्यक्रमात प्रवेश करण्यामागे त्याचा उद्देश काय होता, याचा तपास केला जात आहे.
रोहनसोबत खासगी सुरक्षा रक्षक म्हणून दिलीप कुंदे हा देखील उपस्थित होता. त्याच्याकडे बंदूक तसेच 6 जिवंत काडतुसे आढळून आली. त्यामुळे सुरक्षा व्यवस्थेबाबत गंभीर प्रश्न निर्माण झाले. पोलिसांनी रोहन पारेखसह दिलीप कुंदे यालाही अटक केली आहे.
तपासात दिलीप कुंदे याच्याबाबतही महत्त्वाची माहिती समोर आली आहे. दिलीप याने यापूर्वी भारतीय सैन्यात सेवा बजावली आहे. सैन्यातून निवृत्त झाल्यानंतर मागील सुमारे 1 वर्षापासून तो रोहन पारेखचा खासगी बॉडीगार्ड म्हणून काम करत होता. या कामासाठी रोहनकडून दिलीपला दरमहा सुमारे 1.2 लाख रुपये पगार दिला जात असल्याची माहिती तपासात समोर आली आहे.
दरम्यान, 8 ते 11 सप्टेंबर 2026 या कालावधीत हा जागतिक दर्जाचा फिनटेक कार्यक्रम आयोजित करण्यात आला आहे. दरम्यान, बनावट ओळखपत्र आणि शस्त्रांसह प्रवेश करण्याचा प्रयत्न नेमका कशासाठी करण्यात आला, याचा शोध गुन्हे शाखेकडून घेतला जात आहे.
