पुणे: केतन अग्रवाल मृत्यू प्रकरणाचा तपास दिवसेंदिवस अधिक गतीने सुरू आहेत. पुणे ग्रामीण पोलीस विविध पुरावे गोळा करत असून, मुख्य आरोपी सिया गोयल आणि चेतन चौधरी यांची सखोल चौकशी सुरू आहे. तपासाचा भाग म्हणून दोघांना लोहगड किल्ल्यावर नेण्यात आले होते. या माध्यमातून त्या दिवशी नेमके काय घडले, याची माहिती मिळवण्याचा पोलिसांचा प्रयत्न आहे.
तपासाशी संबंधित सूत्रांच्या माहितीनुसार, केतन आणि सिया यांचा विवाह ठरला होता. मात्र, सियाला हे लग्न मान्य नसल्याचे तपासात समोर आल्याचे सांगितले जात आहे. लग्न मोडल्यास कुटुंबाची बदनामी होईल, अशी भीती तिला वाटत होती, त्यापेक्षा केतनची हत्या करण सोपं, असा दावा तपासातील सूत्रांकडून केला जात आहे. मात्र, या संदर्भात पोलिसांनी अद्याप कोणतीही अधिकृत माहिती जाहीर केलेली नाही.
पोलिसांच्या संशयानुसार, सिया आणि तिचा कथित प्रियकर चेतन चौधरी यांनी मिळून केतनला संपवण्याचा कट रचला. या योजनेनुसार 18 जून रोजी केतनला लोहगड किल्ल्यावर नेण्यात आले. त्यानंतर त्याला दरीत ढकलून त्याची हत्या केली. या प्रकरणातील प्रत्येक पुरावा आणि घटनास्थळावरील माहितीची बारकाईने तपासणी सुरू आहे. सूत्रांच्या माहितीनुसार, सिया आणि चेतनने एकमेकांना धक्का देण्याचा सरावही केल्याचा दावा समोर आला आहे. मात्र, हा सराव नेमका कुठे झाला, याबाबत पोलिसांनी अधिकृत माहिती दिलेली नाही.
सध्या या प्रकरणाचा तपास अनेक अंगांनी सुरू आहे. या प्रकरणामागील संपूर्ण सत्य समोर आणण्यासाठी पोलीस सर्व बाजूंनी तपास करत आहेत.
