डॉ. अशोक बालगुडे
पुणे : मुंबई-बंगळुरू बाह्यवळण मार्गावरील जांभुळवाडी येथील दरी पुलाजवळ रविवारी मध्यरात्री भीषण अपघातात एका महिलेसह दोघांचा मृत्यू झाला, तर १२ जण जखमी झाले. ट्रकने टेम्पोला पाठीमागून दिलेल्या धडकेनंतर दोन्ही वाहने मार्गिका सोडून समोरून येणाऱ्या दोन मोटारींवर आदळल्याने अपघाताची तीव्रता वाढली.
हृदयनाथ मोहन गायकवाड (४७, रा. जोगेश्वरी, मुंबई) आणि आनंदीबाई रामचंद्र वाडकर (५०, रा. नेरूळ, नवी मुंबई) अशी मृतांची नावे आहेत. जखमींपैकी तिघांची प्रकृती गंभीर असून त्यांच्यावर खासगी रुग्णालयात उपचार सुरू आहेत.
पोलिसांनी दिलेल्या माहितीनुसार, रविवारी मध्यरात्री सव्वाबारा वाजण्याच्या सुमारास बाह्यवळण मार्गावरून पुण्याच्या दिशेने ट्रक जात होता. जांभुळवाडीतील दरी पुलाजवळ लक्ष्मी लॉजसमोर ट्रकने टेम्पोला जोरदार धडक दिली. धडकेनंतर ट्रक आणि टेम्पो अनियंत्रित होऊन समोरून येणाऱ्या दोन मोटारींवर आदळले. मोटारींमधील प्रवासी या अपघातात जखमी झाले.
अपघाताची माहिती मिळताच पोलिसांनी घटनास्थळी धाव घेत जखमींना तातडीने रुग्णालयात हलविले. उपचारादरम्यान गायकवाड आणि वाडकर यांचा मृत्यू झाला. या प्रकरणी आंबेगाव पोलिसांनी ट्रक आणि टेम्पोचालकाविरुद्ध गुन्हा दाखल करून दोघांना ताब्यात घेतले आहे. अपघातामुळे बाह्यवळण मार्गावरील वाहतूक काही काळ विस्कळीत झाली होती. अपघातग्रस्त वाहने क्रेनच्या साहाय्याने बाजूला काढल्यानंतर वाहतूक सुरळीत करण्यात आली.
