भोर: भोर तालुक्यातील खोपी गावातील कचरे-जाणकर वस्तीमध्ये रस्त्याचा प्रश्न पुन्हा ऐरणीवर आला आहे. आजारी वृद्ध महिलेला उपचारासाठी रुग्णालयात नेताना रस्त्याअभावी मोठा विलंब झाला. वेळेत वैद्यकीय उपचार न मिळाल्याने फुलाबाई मारुती जानकर यांचा मृत्यू झाल्याची माहिती समोर आली आहे.
फुलाबाई जानकर यांची प्रकृती अचानक खालावली. मात्र, वस्तीपर्यंत वाहन पोहोचण्यासाठी योग्य रस्ता नसल्याने त्यांना तातडीने रुग्णालयात नेणे शक्य झाले नाही. अखेर नातेवाईक आणि ग्रामस्थांनी त्यांना झोळीच्या सहाय्याने मुख्य रस्त्यापर्यंत नेण्याचा प्रयत्न केला.
चिखल आणि खराब रस्त्यातून सुमारे 1 ते 1.5 किलोमीटर अंतर पार करत महिलेला मुख्य मार्गावर आणण्यात आले. त्यानंतर त्यांना रुग्णालयात दाखल करण्यासाठी नेण्यात आले. मात्र, उपचार मिळण्यास झालेला विलंब त्यांच्या जीवावर बेतल्याचे सांगण्यात येत आहे.
खोपी परिसरात अशा प्रकारची ही पहिली घटना नसल्याचे ग्रामस्थांचे म्हणणे आहे. काही दिवसांपूर्वी बाळासाहेब कचरे या वृद्ध व्यक्तीला देखील रस्त्याअभावी वेळेत वैद्यकीय मदत मिळाली नसल्याचा दावा करण्यात आला आहे. त्यामुळे रस्त्याअभावी दोन नागरिकांचा मृत्यू झाल्याने स्थानिकांमध्ये चिंता वाढली आहे.
कचरे वस्ती आणि जानकर वस्तीला जोडणारा रस्ता व्हावा, यासाठी ग्रामस्थांकडून अनेक वर्षांपासून पाठपुरावा सुरू असल्याचे सांगण्यात येते. प्रशासनाकडे मागणी करूनही प्रश्न सुटलेला नसल्याची तक्रार नागरिकांनी केली आहे.
रस्त्याअभावी केवळ रुग्णांनाच नव्हे, तर दैनंदिन जीवनातही नागरिकांना अनेक अडचणींचा सामना करावा लागत आहे. त्यामुळे प्रशासनाने तातडीने या भागाची पाहणी करून रस्त्याचा प्रश्न मार्गी लावावा, अशी मागणी ग्रामस्थांकडून होत आहे.
