लोणी काळभोर, ता. 12: आंबेगाव (पुणे) येथील हवेली दुय्यम निबंधक कार्यालय क्रमांक 20 हे गेल्या दोन दिवसांपासून बंद असल्याने नागरिकांचे अत्यावश्यक दस्त नोंदणी व्यवहार पूर्णपणे ठप्प झाले आहेत. प्रशासनाच्या ढिसाळ नियोजनाचा फटका थेट सामान्य नागरिकांना बसत असून, घर, प्लॉट व शेतजमिनींच्या खरेदी-विक्री व्यवहारांवर मोठा परिणाम झाला आहे. आर्थिक नुकसानासह नागरिकांची प्रचंड गैरसोय होत आहे. (Haveli Secondary Registrar Office)
या कार्यालयातील सहाय्यक दुय्यम निबंधक काही दिवसांपूर्वी सेवानिवृत्त झाले आहेत. त्यांच्या कार्यकाळात उलटसुलट कारभार झाल्याची जोरदार चर्चा असून, त्या पार्श्वभूमीवर पुढील अधिकारी अडचणीत येतील, अशी भीती कर्मचाऱ्यांत पसरली आहे. “येथे पदभार स्वीकारल्यास नोकरी धोक्यात येईल आणि आपणच अडचणीत सापडू,” या मानसिकतेमुळे गेल्या दोन दिवसांपासून एकाही अधिकाऱ्याने चार्ज स्वीकारलेला नाही, ही धक्कादायक बाब समोर आली आहे.
या कार्यालयाच्या कार्यक्षेत्रात पुणे शहरासह आजूबाजूच्या अनेक गावांचा समावेश होतो. दररोज शेकडो नागरिक नोंदणीसाठी येत असतात. मात्र कार्यालय बंद असल्याने नागरिकांची तारांबळ उडाली आहे. अनेकांनी कर्ज प्रक्रिया पूर्ण केली असूनही दस्त नोंदणी रखडली आहे. लग्न, गृहप्रवेश, व्यावसायिक करार अशा महत्त्वाच्या तारखा अडकल्याने संतापाचा उद्रेक होत आहे.
विशेष म्हणजे, वरिष्ठ स्तरावरून अद्याप कायमस्वरूपी पर्यायी नियुक्ती करण्यात आलेली नाही. ‘डिजिटल इंडिया’ व ‘सुलभ सेवा’चा गजर करणाऱ्या शासनाच्या कारभारावर यामुळे प्रश्नचिन्ह निर्माण झाले आहे. एका अधिकाऱ्याच्या सेवानिवृत्तीनंतर संपूर्ण कार्यालय बंद पडणे हे प्रशासनाचे गंभीर अपयश असल्याची तीव्र प्रतिक्रिया नागरिक व्यक्त करत आहेत.
दरम्यान, तातडीने नवीन सहाय्यक दुय्यम निबंधकाची नियुक्ती करून कार्यालय सुरू करावे, अन्यथा आंदोलन छेडण्याचा इशारा नागरिक व व्यावसायिकांनी दिला आहे. महसूल व नोंदणी विभागाने त्वरित हस्तक्षेप करून नागरिकांची गैरसोय दूर करावी, अशी जोरदार मागणी होत आहे.
कोट :
“हवेली दुय्यम निबंधक कार्यालय क्रमांक 20 साठी तात्पुरत्या स्वरूपात एका सहाय्यक दुय्यम निबंधकाची नेमणूक करण्यात आली होती. मात्र त्यांची तब्येत बिघडल्याने ते आजारी आहेत. सध्या तेथे कोणीही काम करत नाही. आमच्याकडे सध्या सहाय्यक दुय्यम निबंधक उपलब्ध नाही. सोमवारपासून नेमणूक करून काम सुरू करू.”
– संतोष हिंगाणे (सहाय्यक जिल्हा निबंधक, पुणे)
