इंदापूर : लग्नानंतर सुखी संसाराची स्वप्ने पाहत सासरी गेलेल्या 21 वर्षीय नवविवाहितेचा दुर्दैवी अंत झाला आहे. सासरच्या मंडळींकडून होत असलेल्या कथित शारीरिक आणि मानसिक त्रासाला कंटाळून तिने राहत्या घरात गळफास घेऊन आत्महत्या केल्याची घटना इंदापूर तालुक्यातील वडापुरी येथे घडली.
या प्रकरणी मृत विवाहितेच्या पतीसह सासू आणि सासऱ्यांविरोधात इंदापूर पोलीस ठाण्यात गुन्हा दाखल करण्यात आला आहे. हुंड्यासाठी पैशांची मागणी करून विवाहितेचा छळ केल्याचा आरोप तिच्या कुटुंबीयांनी केला आहे.
मृत तरुणीचे नाव सोनाली समाधान चंदनशिवे (वय 21, रा. वडापुरी) असे आहे. नोव्हेंबर 2025 मध्ये तिचा विवाह समाधान उर्फ कार्तिक गौतम चंदनशिवे याच्यासोबत झाला होता. लग्नानंतर काही दिवसांतच सासरच्या मंडळींकडून पैशांसाठी तगादा सुरू झाल्याचे पोलिसांत दाखल तक्रारीत नमूद करण्यात आले आहे.
प्लॉट खरेदी करण्यासाठी माहेरून 1 लाख रुपये आणावेत, अशी मागणी करण्यात आल्याचा आरोप आहे. ही रक्कम न दिल्याने सोनालीला शिवीगाळ, मारहाण तसेच जेवण न देता त्रास दिला जात असल्याचे तिच्या वडिलांनी तक्रारीत म्हटले आहे.
सततच्या या कथित छळामुळे सोनाली मानसिकदृष्ट्या त्रस्त झाली होती. अखेर 3 सप्टेंबर 2026 रोजी तिने वडापुरी येथील राहत्या घरात गळफास घेऊन जीवन संपवले. दरम्यान, या प्रकरणी अधिक तपास केला जात आहे.
