पुणे: कौटुंबिक वादातून पोलिसांकडे तक्रार (Hadapsar News) दिल्याच्या रागातून पतीने पत्नीचा दोरीने गळा (Pune Crime) आवळून खुनाचा प्रयत्न केल्याची घटना हडपसरमधील महंमदवाडी परिसरात घडली आहे. या प्रकरणी काळेपडळ पोलिसांनी पतीविरुद्ध गुन्हा दाखल करून त्याला अटक केली आहे. (Latest Marathi News)
अनिल पंढरीनाथ माने (वय 42, रा. साठेनगर, तरवडे वस्ती, महंमदवाडी, हडपसर) असे अटक करण्यात आलेल्या आरोपीचे नाव आहे. याबाबत त्याची पत्नी जया माने (वय 35) हिने काळेपडळ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, अनिल माने आणि त्याच्या पत्नीमध्ये कौटुंबिक कारणावरून वारंवार वाद होत होते. यापूर्वी झालेल्या वादानंतर जया माने हिने पोलिसांकडे तक्रार दिली होती. या तक्रारीचा राग मनात धरून आरोपी अनिल माने पत्नीशी वाद घालत होता.
सोमवारी 22 डिसेंबर रोजी सायंकाळी सुमारे 6 वाजण्याच्या सुमारास दोघांमध्ये पुन्हा जोरदार वाद झाला. या वादातून संतापलेल्या अनिल माने याने पत्नी जया हिचा दोरीने गळा आवळला. त्यानंतर तिच्या डोक्यात लोखंडी गजाने मारहाण केल्याचे फिर्यादीत नमूद करण्यात आले आहे. या हल्ल्यात जया माने गंभीर जखमी झाली.
घटनेची माहिती मिळताच काळेपडळ पोलिसांनी तातडीने घटनास्थळी धाव घेतली. जखमी महिलेला उपचारासाठी रुग्णालयात दाखल करण्यात आले आहे. पोलिसांनी आरोपी अनिल माने याला ताब्यात घेऊन अटक केली असून त्याच्याविरोधात खुनाचा प्रयत्न केल्याप्रकरणी गुन्हा दाखल करण्यात आला आहे.
या प्रकरणाचा पुढील तपास पोलीस उपनिरीक्षक विनायक गुरव करत असून घटनेचा सविस्तर तपास सुरू असल्याची माहिती पोलिसांकडून देण्यात आली आहे.
