पुणे: फुरसुंगी नगरपरिषदेच्या नगराध्यक्ष (Fursungi News) पदासाठी उमेदवारी अर्ज दाखल केलेल्या (Pune News) आम आदमी पार्टीच्या उमेदवार यशवंत अरुण बनसोडे यांना अज्ञात व्यक्तीने कार अडवून जीवघेणी धमकी दिल्याची धक्कादायक घटना समोर आली आहे. 1 डिसेंबर रोजी सकाळी साधारण साडेआठ ते नऊच्या दरम्यान सासवड रोड रेल्वे स्टेशन परिसरातून बनसोडे कारने जात असताना एका अनोळखी व्यक्तीने हात दाखवून त्यांचे वाहन थांबवले. वाहन थांबवताच त्या व्यक्तीने निवडणुकीतून माघार घेण्यास जबरदस्ती करत धमकी दिली. माघार घेतली नाही तर तुमचा संतोष देशमुख करू, असे म्हणत त्याने गंभीर इशारा दिल्याचे तक्रारीत नमूद आहे. (Breaking News)
फिर्यादींच्या म्हणण्यानुसार, त्या व्यक्तीच्या कमरेला लोखंडी शस्त्र लपवलेले दिसले. याच परिसरात रेल्वे पटरीजवळ दुसरा अनोळखी व्यक्ती उभा असल्याचेही बनसोडे यांनी पाहिले. त्याच्याजवळदेखील शस्त्र असण्याची शक्यता वर्तवण्यात आली आहे. या घटनेनंतर घाबरलेल्या बनसोडे यांनी त्वरित पोलिसांकडे धाव घेतली.
फुरसुंगी पोलिसांनी अज्ञात आरोपींवर भारतीय न्याय संहिता कलम 126(2), 352(3) आणि महाराष्ट्र पोलीस अधिनियम 37(1)(3) सह 135 नुसार गुन्हा दाखल केला आहे. पोलिस उपनिरीक्षक महेश नलवडे या प्रकरणाचा तपास करत आहेत.
दरम्यान, राज्य निवडणूक आयोगाने फुरसुंगी–उरुळी देवाची नगरपरिषदेची निवडणूक सध्या स्थगित केली आहे. नगराध्यक्ष, सदस्य आणि इतर सर्व पदांसाठीची प्रक्रिया थांबवण्यात आली असून निवडणूक प्रक्रिया 4 डिसेंबरपासून पुन्हा सुरू होणार आहे. निवडणूक प्रत्यक्षात स्थगित असतानाही नगराध्यक्ष पदाच्या उमेदवारालाच धमकी देण्यात आल्याने परिसरात खळबळ उडाली असून या प्रकरणाचा राजकीय वातावरणावर परिणाम होण्याची शक्यता व्यक्त केली जात आहे.
