पुणे: पुणे आणि पिंपरी-चिंचवडमध्ये विषारी दारू प्रकरणात 18 हून अधिक जणांचा मृत्यू झाल्यानंतर तपासात महत्त्वाची माहिती समोर आली आहे. हातभट्टी दारू पुरवठ्यात सहभागी असलेल्या राजू प्रजापतीशी आर्थिक व वैयक्तिक संबंध असल्याचे उघड झाल्याने उरुळी कांचन आणि यवत पोलिस ठाण्यातील प्रत्येकी दोन पोलिस कर्मचाऱ्यांवर निलंबनाची कारवाई करण्यात आली आहे.
पुणे ग्रामीण पोलिस अधीक्षक संदीपसिंह गिल यांनी खात्यांतर्गत चौकशीनंतर उरुळी कांचन पोलिस ठाण्यातील अजित काळे व सुमित वाघ तसेच यवत पोलिस ठाण्यातील रामदास जगताप व सुभाष डोईफोडे यांना निलंबित करण्याचे आदेश दिले आहेत.
महाराष्ट्र पोलिस अधिनियम 1951 च्या कलम 25(2) अंतर्गत ही कारवाई करण्यात आली असून, निलंबन काळात संबंधित कर्मचाऱ्यांना पाषाण येथील पोलिस मुख्यालयात हजर राहण्याचे आदेश देण्यात आले आहेत. तसेच वरिष्ठांच्या परवानगीशिवाय मुख्यालय सोडण्यास बंदी घालण्यात आली आहे.
दरम्यान, या कारवाईनंतरही दारू पुरवठ्यामागील मुख्य साखळीवर अद्याप कारवाई झालेली नसल्याची चर्चा परिसरात सुरू असून, राजू प्रजापती हा केवळ एक मोहरा असल्याचे बोलले जात आहे.
