लोणी काळभोर, ता. २८ : नायगाव फाटा येथून बेपत्ता झालेल्या १६ वर्षीय अल्पवयीन मुलाचा अखेर लोणी काळभोर पोलिसांनी शोध लावला असून, संबंधित मुलाला सुखरूप ताब्यात घेऊन उरुळी कांचन पोलिसांकडे सुपूर्त करण्यात आले आहे. या घटनेमुळे गेल्या काही तासांपासून परिसरात सुरू असलेल्या चर्चांना पूर्णविराम मिळाला आहे.
पियुष संदीप शिंदे (वय १६ वर्षे १० महिने) असे संबंधित मुलाचे नाव आहे. तो मागील काही दिवसांपासून बेपत्ता होता. याप्रकरणी उरुळी कांचन पोलीस ठाण्यात अपहरणाचा गुन्हाही दाखल करण्यात आला होता.
दरम्यान, बेपत्ता होण्यापूर्वी पियुषला कुंजीरवाडी ग्रामपंचायत हद्दीतील थेऊर फाटा परिसरातील एका हार्डवेअर दुकानात अमानुषपणे मारहाण करण्यात आल्याचा धक्कादायक प्रकार समोर आला होता. या मारहाणीचा व्हिडिओ सोशल मीडियावर व्हायरल झाल्यानंतर संपूर्ण प्रकरणाने गंभीर वळण घेतले होते. व्हिडिओमध्ये अल्पवयीन मुलाला काठीने व लाथाबुक्क्यांनी मारहाण होत असल्याचे दिसत असल्याने नागरिकांमध्ये संतापाचे वातावरण निर्माण झाले होते.
पाहा व्हिडीओ:
View this post on Instagram
अशातच संबंधित मुलगा कुंजीरवाडी परिसरात फिरत असल्याची माहिती लोणी काळभोर पोलीस ठाण्याचे पोलीस हवालदार निलेश कोल्हे आणि पोलीस अंमलदार सचिन सोनवणे यांना एका खबऱ्यामार्फत मिळाली. माहिती मिळताच पोलिसांनी तत्काळ घटनास्थळी धाव घेत शोधमोहीम राबवली आणि अल्पवयीन मुलाला ताब्यात घेतले.यानंतर लोणी काळभोर पोलिसांनी या घटनेची माहिती उरुळी कांचन पोलिसांना दिली.
या घटनेची माहिती मिळताच उरुळी कांचन पोलीस घटनास्थळी दाखल झाले. त्यानंतर पियुष शिंदे याला सुखरूप उरुळी कांचन पोलिसांच्या ताब्यात देण्यात आले. दरम्यान, मुलावर झालेल्या कथित मारहाणीप्रकरणी आणि त्याच्या बेपत्ता होण्यामागील नेमके कारण काय, याचा तपास आता पोलीसांकडून सुरू असून, या संपूर्ण प्रकरणाकडे परिसरातील नागरिकांचे लक्ष लागले आहे.
