लोणी काळभोर, ता. १०: दोन वर्षांसाठी तडीपार केलेले असतानाही लोणी काळभोरमध्ये परतलेल्या पियुष ऊर्फ युवराज भिसे (वय २२) याला हातात लोखंडी कोयता घेऊन दहशत माजवत असताना लोणी काळभोर पोलिसांनी ताब्यात घेतले. महादेव मंदिर परिसरात जखमी अवस्थेत आरडाओरड व शिवीगाळ करीत असलेल्या भिसेकडून पोलिसांनी लोखंडी कोयताही जप्त केला आहे. या कारवाईमुळे परिसरात काही काळ खळबळ उडाली.
पोलिस हवालदार आण्णा दिलीप माने यांनी सरकारतर्फे लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार पोलिसांना बातमीदारामार्फत तडीपार आरोपी पियुष ऊर्फ युवराज भिसे हा लोणी गावातील महादेव मंदिराजवळ हातात कोयता घेऊन दहशत करीत असल्याची माहिती ९ ऑगस्ट रोजी सायंकाळी पाचच्या सुमारास मिळाली.
या घटनेची माहिती मिळताच तपास पथकाचे प्रभारी पोलीस उपनिरीक्षक सोनटक्के यांच्या मार्गदर्शनाखाली पोलीस हवालदार जगदाळे व पथकाने पंचांसह महादेव मंदिर परिसरात धाव घेतली. मंदिरासमोरील पडक्या घराजवळ भिसे हा जखमी अवस्थेत मोठमोठ्याने आरडाओरड आणि शिवीगाळ करीत हातात लोखंडी कोयता घेऊन असल्याचे पोलिसांना दिसले. पोलिसांनी त्याला सायंकाळी सव्वापाचच्या सुमारास ताब्यात घेतले.
अंगझडतीत १९ इंची लोखंडी कोयता जप्त
पंचांसमक्ष घेतलेल्या अंगझडतीत भिसेकडून लोखंडी कोयता जप्त करण्यात आला. सुमारे १९ इंच लांबीचा, निळ्या प्लास्टिकच्या मुठीचा आणि एका बाजूने धार असलेला हा कोयता असल्याचे पोलिसांनी नमूद केले आहे. त्याची अंदाजे किंमत २०० रुपये आहे. भिसे जखमी असल्याने त्याला प्राथमिक प्रक्रियेनंतर उपचारासाठी पोलिस बंदोबस्तात ससून रुग्णालयात पाठविण्यात आले.
दोन वर्षांसाठी तडीपार; तरीही लोणीत प्रवेश
पोलिसांच्या फिर्यादीनुसार, पोलीस उपायुक्त, परिमंडळ ६, पुणे शहर यांनी १ जून २०२६ रोजीच्या तडीपार आदेशानुसार भिसेला दोन वर्षांसाठी पुणे पोलीस आयुक्तालय, पिंपरी-चिंचवड आयुक्तालय आणि पुणे जिल्ह्याच्या हद्दीतून हद्दपार केले होते. तसेच पुणे शहरात शस्त्रे बाळगण्यास मनाई असतानाही भिसे कोणतीही सक्षम अधिकाऱ्याची किंवा न्यायालयाची पूर्वपरवानगी न घेता लोणीत आल्याचे पोलिसांच्या फिर्यादीत नमूद आहे.
‘मला चौघांनी मारहाण केली’-भिसेचा पोलिसांकडे दावा
दरम्यान, ताब्यात घेतल्यानंतर भिसेने पोलिसांना आपण जखमी कसे झालो याबाबत माहिती देताना नरेश ससाणे, कार्तिक जाधव, प्रज्वल शिंदे आणि दादा पाखरे यांनी मारहाण केल्याचे सांगितल्याचे फिर्यादीत नमूद आहे. त्यामुळे भिसे जखमी होण्यामागील नेमके कारण काय, याचाही तपास पोलिसांकडून करण्यात येत आहे.
दरम्यान, या प्रकरणी आरोपी पियुष ऊर्फ युवराज भिसे याच्यावर लोणी काळभोर पोलीस ठाण्यात भारतीय हत्यार कायदा कलम ४(२५), महाराष्ट्र पोलीस अधिनियम कलम ३७(१)(३) सह १३५, १४२ तसेच क्रिमिनल लॉ अमेंडमेंट अॅक्ट कलम ३ व ७ अन्वये गुन्हा दाखल करण्यात आला असून, पुढील तपास सुरू आहे.
