लोणी काळभोर, ता. 14 : भावाच्या लग्नासाठी घेतलेले पैसे परत देण्यावरून घरात सुरू असलेल्या चर्चेत हस्तक्षेप करत भावाच्या सासऱ्याने तरुणासह त्याच्या वडिलांना शिवीगाळ करून लाकडी काठी आणि दगडाने मारहाण केल्याची धक्कादायक घटना उरळी देवाची येथील विघ्नहर्ता पार्क परिसरात घडली. या मारहाणीत तरुणाच्या डोक्याला गंभीर दुखापत झाली असून, त्याच्या डोक्याला तब्बल सहा टाके घालावे लागले आहेत. कौटुंबिक वादातून झालेल्या या मारहाण प्रकरणामुळे उरळी देवाची परिसरात खळबळ उडाली आहे.
कृष्णा शंकर चव्हाण (वय 28) असे जखमी तरुणाचे नाव आहे. याप्रकरणी अमर कृष्णा भोसले (वय 40, रा. पंढरपूर, जि. सोलापूर) याच्याविरुद्ध फुरसुंगी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, कृष्णा चव्हाण हे कुटुंबासह उरळी देवाची येथील विघ्नहर्ता पार्कमध्ये राहतात. 11 नोव्हेंबर रोजी रात्री नऊ वाजण्याच्या सुमारास कृष्णा, त्यांचे वडील शंकर आणि भाऊ ऋषिकेश हे घरगुती विषयांवर चर्चा करत होते. यावेळी कृष्णा यांनी ऋषिकेश याला त्याच्या लग्नासाठी लोकांकडून घेतलेले पैसे परत करण्यास सांगितले. यावरून दोघांमध्ये शाब्दिक वाद झाला.
दरम्यान, ऋषिकेश याचे सासरे अमर भोसले तेथे आले. त्यांनी ‘तुम्ही माझ्या जावयाला का बोलता?’ असे म्हणत कृष्णा आणि त्यांच्या वडिलांना शिवीगाळ करण्यास सुरुवात केली. त्यानंतर कृष्णा यांना हाताने मारहाण केली. वडील शंकर हे मध्यस्थी करण्यासाठी आले असता भोसले यांनी त्यांच्या पायावर लाकडी काठीने वार केले. वडिलांना वाचविण्यासाठी कृष्णा मध्ये गेले असता त्यांच्या डोक्यात काठीने जोरदार प्रहार केला. त्यामुळे त्यांच्या डोक्याला गंभीर जखम होऊन रक्तस्राव सुरू झाला. एवढ्यावरच न थांबता आरोपीने शंकर यांच्या छातीवर दगड फेकून मारला.
त्यानंतर ‘माझ्या जावयाला पुन्हा बोललात तर तुम्हाला जिवंत ठेवणार नाही,’ अशी धमकी देत आरोपी तेथून निघून गेला. जखमी कृष्णा यांच्यावर उरळी देवाची येथील जीवन क्लिनिकमध्ये उपचार करण्यात आले. डॉक्टरांनी त्यांच्या डोक्याच्या जखमेवर सहा टाके घातले. उपचारानंतर प्रकृतीत सुधारणा झाल्यावर त्यांनी 12 नोव्हेंबर रोजी पोलिसांकडे धाव घेत तक्रार दाखल केली. त्यानुसार अमर भोसले यांच्यावर भारतीय न्याय संहिता (बी एन एस), 2023 – 115(2),118(1),351(2),352 प्रमाणे फुरसुंगी पोलीस ठाण्यात गुन्हा दाखल करण्यात आला आहे.
