पुणे: पुण्यातील नवी सांगवी परिसरात कौटुंबिक वादातून एका 60 वर्षीय महिलेची हत्या झाल्याची घटना समोर आली आहे. संपत्तीतील वाट्यावरून सुरू असलेल्या वादातून नातवानेच आपल्या सावत्र आजीवर चाकूने वार केल्याचा आरोप आहे. या घटनेनंतर आरोपी स्वतः सांगवी पोलीस ठाण्यात पोहोचला आणि त्याने पोलिसांना गुन्ह्याची माहिती दिली. शुक्रवारी सकाळी सुमारे 9 वाजता क्रांती चौक परिसरात ही घटना घडली. या प्रकरणामुळे परिसरात खळबळ उडाली आहे.
मृत महिलेचे नाव मंगल बाबूराव शिंगोरे (वय 60, रा. क्रांती चौक, नवी सांगवी) असे आहे. तर ओंकार किसान शिंगोरे (वय 26, रा. पिंपळे गुरव) असे आरोपीचे नाव आहे. मंगल या ओंकारच्या सावत्र आजी होत्या. ओंकार हा त्यांच्या सावत्र मुलाचा मुलगा असल्याची माहिती समोर आली आहे.
मिळालेल्या माहितीनुसार, संपत्तीतील हिस्स्यावरून मंगल आणि ओंकार यांच्यात वाद सुरू होता. याच वादातून ओंकारने मंगल यांच्यावर चाकूने वार केल्याचा आरोप आहे. त्यानंतर तो थेट सांगवी पोलीस ठाण्यात गेला आणि त्याने पोलिसांना घटनेबाबत सांगितले.
माहिती मिळताच पोलिसांनी घटनास्थळी धाव घेतली. तेथे मंगल या स्वच्छतागृहात रक्ताच्या थारोळ्यात पडलेल्या आढळल्या. पोलिसांनी त्यांना तातडीने जिल्हा रुग्णालयात नेले. मात्र, तपासणीनंतर डॉक्टरांनी त्यांना मृत घोषित केले. या प्रकरणी मंगल यांच्या मुलगी संगीता चटपल्लीवार (रा. कात्रज) यांनी पोलिसांत फिर्याद दिली आहे. संपत्तीच्या वादातून घडलेल्या या घटनेचा पुढील तपास सांगवी पोलीस करत आहेत. या प्रकरणात पोलिसांकडून पुढील कायदेशीर कारवाई केली जात आहे.
