दिल्ली: मुख्य निवडणूक आयुक्त ज्ञानेश कुमार यांच्याविरोधात आंदोलन करण्यासाठी दिल्लीला पोहोचलेल्या कॉकरोच जनता पार्टीचे संस्थापक अभिजीत दिपके आणि त्यांच्या सहकाऱ्यांना दिल्ली पोलिसांनी विमानातूनच ताब्यात घेतल्याची माहिती समोर आली आहे. १० ऑक्टोबर रोजी दिल्लीत आंदोलन करण्याची घोषणा करण्यात आली होती. मात्र, आंदोलनापूर्वीच पोलिसांनी कारवाई केल्याने या घडामोडींकडे लक्ष लागले आहे.
मिळालेल्या माहितीनुसार, अभिजीत दिपके हे आपल्या सहकाऱ्यांसह मुंबईहून दिल्लीला रवाना झाले होते. त्यांचे विमान दिल्ली विमानतळावर उतरल्यानंतर दिल्ली पोलिसांचे पथक विमानाजवळ पोहोचले. पोलिसांनी अभिजीत दिपके यांच्यासह सौरव दास आणि आशुतोष रांका यांना विमानातूनच ताब्यात घेतले. त्यानंतर त्यांना विमानतळावरील प्रतीक्षाकक्षात नेण्यात आल्याचे सांगण्यात येत आहे.
दिल्ली पोलिसांनी अभिजीत दिपके यांची समजूत काढून त्यांना आंदोलनापासून परावृत्त करण्याचा प्रयत्न केला. मात्र, आंदोलन करण्यावर ते ठाम राहिले. आंदोलन करणे हा आपला संवैधानिक अधिकार असल्याची भूमिका त्यांनी मांडल्याचे वृत्त आहे. त्यानंतर पोलिसांनी त्यांना ताब्यात घेतले.
कॉकरोच जनता पार्टीकडून १० ऑक्टोबर रोजी दिल्लीमध्ये आंदोलनाचे आयोजन करण्यात आले होते. या आंदोलनात अधिकाधिक नागरिकांनी सहभागी व्हावे, असे आवाहन पक्षाकडून करण्यात आले होते. या पार्श्वभूमीवर दिल्ली पोलिसांनी सुरक्षा व्यवस्था वाढवली होती. आंदोलनाच्या आधीपासूनच काही आंदोलकांना ताब्यात घेण्याची कारवाई सुरू असल्याचे सांगण्यात आले आहे.
दरम्यान, अभिजीत दिपके आणि त्यांच्या सहकाऱ्यांना किती काळ ताब्यात ठेवले जाणार, तसेच त्यांना दिल्लीत आंदोलन करण्याची परवानगी मिळणार का, याबाबत अद्याप स्पष्टता नाही. पोलिसांच्या या कारवाईनंतर कॉकरोच जनता पार्टीच्या नियोजित आंदोलनाचे पुढे काय होणार, याकडे लक्ष लागले आहे.
