दिल्ली: यूट्यूबर ध्रुव राठीला गुरुग्राममधील घरातून पोलिसांनी ताब्यात घेतल्याचे वृत्त समोर आले आहे. कॉकरोच जनता पार्टी (CJP) आणि ऑल इंडिया स्टुडंट्स असोसिएशन (AISA) यांच्या नियोजित आंदोलनाच्या पार्श्वभूमीवर ही कारवाई झाल्याचे सांगितले जात आहे. CJP ने आपल्या X खात्यावरून यासंदर्भात माहिती दिली.
CJP च्या पोस्टनुसार, शनिवारी सकाळी सुमारे 8 वाजता साध्या कपड्यांतील जवळपास 50 पोलीस कर्मचारी ध्रुव राठीच्या गुरुग्राम येथील निवासस्थानी पोहोचले. त्यानंतर त्याला ताब्यात घेण्यात आल्याचा दावा करण्यात आला. मात्र, त्याला ताब्यात घेण्यामागील नेमके कारण काय, याबाबत स्पष्ट माहिती समोर आलेली नाही.
आंदोलनाच्या पार्श्वभूमीवर राजधानीत सुरक्षा व्यवस्था वाढवण्यात आली आहे. विविध वृत्तांनुसार, दिल्लीमध्ये 35,000 हून अधिक पोलीस आणि निमलष्करी दलाचे कर्मचारी तैनात करण्यात आले. प्रमुख रस्त्यांवर बॅरिकेड्स उभारण्यात आले असून, शहराच्या सीमांवरही वाहनांची तपासणी वाढवण्यात आली आहे. आंदोलनात सहभागी होण्यासाठी येणाऱ्या लोकांना रोखण्यासाठी पोलिसांकडून विविध उपाययोजना करण्यात आल्या.
या कारवाईदरम्यान अनेक आंदोलकांना ताब्यात घेतल्याचे वृत्त आहे. ध्रुव राठीला ताब्यात घेतल्याच्या बातमीमुळेही या आंदोलनाकडे सर्वांचे लक्ष वेधले गेले आहे. त्याच्यावरील कारवाईबाबत अधिकृत स्पष्टीकरण आणि पुढील घडामोडींकडे आता लक्ष लागले आहे.
