बारामती: बारामती तालुक्यातील श्री सोमेश्वर सहकारी साखर कारखान्याच्या निवडणुकीला काही तास शिल्लक असताना पैशांच्या कथित वाटपावरून राजकीय वातावरण तापले आहे. शुक्रवारी मध्यरात्री कारखान्याच्या कार्यक्षेत्रात मतदारांना पैसे वाटले जात असल्याची चर्चा सुरू झाली आहे. सुनेत्रा पवार यांच्या पॅनेलच्या कार्यकर्त्यांकडून मतदारांना आमिष दाखवले जात असल्याचा आरोप पुरुषोत्तम जगताप यांच्या समर्थकांनी केला आहे. तसेच माळेगाव नगरपंचायतीच्या नगराध्यक्षांच्या गाडीत २० लाख रुपये सापडल्याचा दावाही जगताप यांच्या कार्यकर्त्यांनी केला आहे. या आरोपांवर सुनेत्रा पवार यांच्या पॅनेलकडून प्रतिक्रिया मिळू शकलेली नाही.
श्री सोमेश्वर सहकारी साखर कारखान्याची पंचवार्षिक निवडणूक ११ ऑक्टोबर २०२६ रोजी होणार असून, मतमोजणी १२ ऑक्टोबरला होणार आहे. संचालक मंडळाच्या २१ जागांसाठी एकूण ८३ उमेदवार निवडणुकीच्या रिंगणात आहेत. या निवडणुकीत तिरंगी लढत होत असून, त्यामुळे कारखान्याच्या कार्यक्षेत्रातील राजकीय हालचालींना वेग आला आहे.
‘सोमेश्वर विकासपुरुष अजितदादा पवार पॅनेल’चे नेतृत्व उपमुख्यमंत्री सुनेत्रा पवार आणि जय पवार करत आहेत. शरद पवार गटाच्या ‘सोमेश्वर शेतकरी विकास पॅनेल’चे नेतृत्व युगेंद्र पवार करत आहेत. तर कारखान्याचे विद्यमान अध्यक्ष पुरुषोत्तम जगताप यांनी स्वतंत्र ‘सोमेश्वर विकास पॅनेल’ उभे केले आहे. अजित पवार गटापासून वेगळी भूमिका घेत भाजप नेत्यांच्या सहकार्याने निवडणूक लढवण्याचा निर्णय घेतल्याने जगताप यांच्या बंडखोरीची चर्चा झाली होती. त्यानंतर राष्ट्रवादी काँग्रेसने जगताप आणि त्यांच्या पॅनेलमधील उमेदवारांची पक्षातून हकालपट्टी केली.
मतदानाच्या पूर्वसंध्येला पैशांच्या कथित वाटपाचा मुद्दा समोर आल्याने निवडणुकीतील चुरस आणखी वाढली आहे. या प्रकरणासंदर्भात सकाळी ११ वाजता पत्रकार परिषद आयोजित करण्यात आल्याची माहिती आहे. संबंधित आरोपांबाबत अधिकृत माहिती आणि दुसऱ्या बाजूची प्रतिक्रिया समोर आल्यानंतरच वस्तुस्थिती स्पष्ट होऊ शकणार आहे.
