गणेश सुळ
केडगाव : राज्यात धनगर समाज आरक्षणाच्या मागणीसाठी आक्रमक होत आहे. धनगर समाजातील कार्यकर्ते निरा, बारामती, काटेवाडी, माळेगाव, सरदेवाडी येथे आमरण उपोषणास बसले आहेत. यशवंत सेनेने चौंडी येथे २१ दिवसांचे उपोषण केले होते. त्यावेळी सरकारने धनगर समाजाला लिखित आश्वासन दिले; परंतु दिलेला शब्द पाळला नाही, असा आरोप करत यशवंत सेनेने आंदोलनाची पुढील दिशा स्पष्ट केली आहे.
या पार्श्वभूमीवर दौंड तालुक्यातील सकल धनगर समाजाच्या वतीने आरक्षणाच्या अंमलबजावणीसाठी दौंडचे तहसिलदार अरुण शेलार यांना निवेदन देण्यात आले. या वेळी “येळकोट येळकोट जय मल्हार,” “कोण म्हणते देत नाय, घेतल्याशिवाय जात नाय,” अशी जोरदार घोषणाबाजी करण्यात आली. या वेळी दौंड तालुक्यातील धनगर समाजातील मोठा जनसमुदाय उपस्थित होता.
धनगर समाजाच्या आरक्षणाबाबत ५० दिवसांत निर्णय घेऊ, असे सरकारने म्हटले आहे. त्यामुळे सरकारच्या शब्दावर विश्वास ठेवत धनगर समाजाचा गेल्या ७५ वर्षांचा वनवास दूर होईल, दिवाळी गोड होईल, अशी आशा होती. परंतु राज्य सरकराने धनगर बांधवांची क्रूर थट्टा केली आहे.
आता ५० दिवस संपले तरी सरकारने आरक्षणाच्या निर्णयाबाबत एकही पाऊल टाकले नाही. त्यामुळे चौंडीत आमरण उपोषणाला सुरुवात केली; पण त्याचे प्रतिबिंब राज्यातील प्रत्येक गावांत, तालुक्यात, जिल्ह्यात उमटलेले दिसेल. धनगर बांधव पुढाऱ्यांना घरातून बाहेर पडण्यास बंदी घालेल. धनगर हा ओबीसीतील सर्वात मोठा घटक आहे, असे मत दौंड तालुक्यातील सकल धनगर समाजाच्या वतीने व्यक्त करण्यात आले.
धनगर समाजाला सरकारने दिलेले आश्वासन पाळले नाही. राज्यात धनगर समाज हा सर्वांत मोठा दुसऱ्या क्रमांकाचा समाज आहे. त्याचा हा अपमान आहे. सरकार मधील काळात बैठका घेते, वेगळी भूमिका घेते आणि प्रत्यक्षात वेगळा निर्णय घेते. त्यामुळे राज्य सरकारबद्दल धनगर समाजाच्या भावना तीव्र आहेत. त्याचे पडसाद येणाऱ्या काळात राज्यात दिसतील. धनगरांच्या आक्रोशाला सरकारला सामोरे जावे लागेल.
– दिलीप हंडाळ, सभापती, कृषी उत्पन्न बाजार समिती, दौंड
