पुणे: लोहगड परिसरात झालेल्या केतन अग्रवाल हत्याकांडाच्या तपासात पोलिसांना अनेक महत्त्वाची माहिती मिळाली आहे. पुणे ग्रामीण पोलिसांनी या प्रकरणाचा सखोल तपास करून न्यायालयात सुमारे 5 हजार पानांचे दोषारोपपत्र दाखल केले आहे. या तपासातून हत्येच्या कटाबाबत काही धक्कादायक बाबी समोर आल्या आहेत.
पोलिसांच्या तपासानुसार, केतनच्या हत्येचा कट अचानक आखण्यात आलेला नव्हता. या घटनेपूर्वी काही काळापासून त्याबाबत नियोजन सुरू असल्याचे तपासात समोर आले. सिया गोयल आणि चेतन चौधरी यांच्याशिवाय आणखी दोन व्यक्तींना या योजनेची माहिती मिळाली होती.
या दोघांनी कथित कटाची माहिती समजल्यानंतर सिया आणि चेतनला हत्येचा मार्ग सोडण्याचा सल्ला दिल्याचे दोषारोपपत्रात नमूद करण्यात आले आहे. सियाच्या परिचयातील एका व्यक्तीने तर दोघांच्या नात्याबाबत कुटुंबीयांशी चर्चा करून हा वाद शांततेने सोडवण्याचा पर्याय सुचवल्याचे तपासात समोर आले. मात्र हा सल्ला मानला गेला नसल्याचा पोलिसांचा दावा आहे.
दरम्यान, सुरुवातीला केतनला ठार करण्याऐवजी त्याला गंभीर दुखापत करून कायमचे अपंग करण्याचा विचार झाल्याची माहितीही तपासात समोर आली आहे. यासाठी कथितरित्या सुपारी घेणाऱ्या व्यक्तीचा शोध घेण्याबाबत रितेश हंगे याने चौकशी केली असल्याचे पोलिसांनी म्हटले आहे. रितेश हा चेतनचा मित्र असून त्यांच्यात आर्थिक व्यवहारही असल्याचे तपासात नमूद आहे. दरम्यान. याप्रकरणी अधिक तपास सुरु आहे.
