दौंड, ता. 11: “तुम्ही जर टेरेसवर गेले तर तुम्हाला बघून घेतो” असे म्हणून पत्रकाराला व त्यांच्या बहिणीला (Daund News) जातीवाचक शिवीगाळ करून जिवे मारण्याची धमकी दिल्याचा प्रकार उघडकीस आला आहे. याप्रकरणी दोघांवर अनुसूचित जाती-जमाती प्रतिबंधक कायद्यांतर्गत (अॅट्रॉसिटी) गुन्हा दाखल करण्यात आला आहे. शनिवारी (ता. 08) दुपारी पाऊणे दोन वाजण्याच्या सुमारास स्प्रिंगग्लोरी अपार्टमेन्ट सी. टी. इन हॉटेलचे समोर हि घटना घडली आहे.
फरहाना एहमदअली अन्सारी व मुलगा फवाज एहमदअली अन्सारी (रा. स्प्रिंगग्लोरी अपार्टमेन्ट, सी.टी.इन हॉटेलचे समोर, सहकार चौक दौंड, ता. दौंड) असे गुन्हा दाखल करण्यात आलेल्या दोघांची नावे आहेत. याप्रकरणी सुनिल ज्ञानदेव शिंदे (वय 50, व्यवसाय -पत्रकार, रा. स्प्रिंगग्लोरी अपार्टमेंट, सहकार चौक, दौंड) यांनी दौंड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शनिवारी (ता. 08) पाऊणे दोनच्या सुमारास आरोपी फरहाना अन्सारी व तिचा मुलगा फवाज अन्सारी (रा. त्याच अपार्टमेंटमधील) यांनी फिर्यादी व त्यांची बहिण प्रमिला सोनवणे यांना जातीवाचक शिवीगाळ केली आणि जीवे मारण्याची धमकी दिली. घटनेच्या वेळी शेजारी अरमान अय्यूब पठाण हे उपस्थित होते.
त्यावेळी फरहाना अन्सारी व त्यांचा मुलगा फवाज अन्सारी यांना बिल्डींगमधील पार्किंग व टेरेस कॉमन असून तुम्ही आम्हाला जातीवाचक शिवीगाळ करू नका असे फिर्यादी म्हंटले असता त्यांनी तुम्ही जर टेरेसवर गेला तर तुम्हाला बघून घेतो असे बोलून मला जिवे मारण्याची धमकी दिली.
दरम्यान, त्यानंतर प्रमिला सोनवणे व सुनिल शिंदे यांची पत्नी जानकी यांच्या सोबत घडलेल्या प्रकारानंतर विचार विनीमय करून सुनिल शिंदे यांनी दौंड पोलीस ठाण्यात तक्रार दिली आहे. शिंदे यांनी दिलेल्या तक्रारीनुसार पोलिसांनी फरहाना अन्सारी, मुलगा फवाज अन्सारी यांचे विरूद्ध अनुसूचित जाती-जमाती प्रतिबंधक कायद्यांतर्गत (अॅट्रॉसिटी) गुन्हा दाखल करण्यात आला आहे. या प्रकरणी पोलीस उपनिरीक्षक कदम यांनी गुन्हा दाखल केला असून तपास उपविभागीय पोलीस अधिकारी यांच्याकडे सोपविण्यात आला आहे.
