मुंबई: मुंबईच्या कांदिवली परिसरातून एक धक्कादायक प्रकार समोर आला आहे, ज्याने संपूर्ण शहराला हादरवून सोडले आहे. एका २२ वर्षीय तरुणाने आपल्या १७ वर्षांच्या अल्पवयीन प्रेयसीची अतिशय क्रूरपणे हत्या केली. विशेष म्हणजे, या गुन्ह्यामागील आरोपीची कार्यपद्धती पाहून पोलीसही अवाक झाले आहेत. आरोपी सूरज वाघमारे याने खून करण्यापूर्वी टीव्हीवरील गुन्हेगारी मालिका ‘क्राइम पेट्रोल’ पहिली आणि गुन्ह्याचे पुरावे कसे नष्ट करावेत, याचे प्रशिक्षण त्याने याच मालिकेतून घेतल्याचे समोर आले आहे.
मिळालेल्या माहितीनुसार, आरोपी सूरज आणि पीडित मुलगी यांच्यात गेल्या १.५ वर्षांपासून ओळख होती. सूरज तिला लग्नासाठी वारंवार गळ घालत होता, मात्र मुलीने त्याला स्पष्ट नकार दिला होता. नकार दिल्याचा राग मनात धरून सूरजने तिचा कायमचा काटा काढण्याचा भयानक कट आखला. कटानुसार, त्याने मुलीला कांदिवलीतील दामू नगर येथील घनदाट जंगलात भेटायला बोलावले. तिथे तिला एक सरप्राईज देण्याचे खोटे आश्वासन देऊन डोळे मिटायला सांगितले. तिने डोळे मिटताच, त्याने सोबत आणलेल्या धारदार चाकूने तिचा गळा चिरून तिची निर्दयीपणे हत्या केली.
खुनानंतर त्याने मृतदेह त्याच जंगलात झुडपांमध्ये फेकून दिला आणि पोलिसांची दिशाभूल करण्यासाठी ‘क्राइम पेट्रोल’मधील तंत्रांचा वापर करून पुरावे नष्ट करण्याचा प्रयत्न केला. मात्र, पोलिसांच्या तपासाची चक्रे फिरली आणि अवघ्या काही काळातच सूरज वाघमारेला बेड्या ठोकण्यात आल्या. पोलीस चौकशीत त्याने आपला गुन्हा कबूल केला आहे. सध्या स्थानिक पोलीस या प्रकरणाचा सखोल तपास करत असून, आरोपीला कठोर शिक्षा व्हावी, अशी मागणी केली जात आहे.
