आदित्य बोराटे
पुणे: धनगर समाजाचे श्रद्धास्थान असलेल्या हुतात्मा वीर शिंग्रोबा धनगर यांच्या नावाने मुंबई-बंगळुरू राष्ट्रीय महामार्गावरील संबंधित कनेक्टिंग लिंकचे नामकरण करावे, मुंबईतील ऐतिहासिक चर्चगेट रेल्वे स्थानकाला पुण्यश्लोक अहिल्यादेवी होळकर यांचे नाव द्यावे, तसेच श्री संत बाळूमामा देवस्थानासाठी स्वतंत्र कायदा करावा, अशा विविध मागण्या धनगर समाजाच्या वतीने करण्यात आल्या आहेत. याबाबतचे निवेदन इंदापूरचे तहसीलदार जीवन बनसोडे यांना देण्यात आले.
हुतात्मा वीर शिंग्रोबा धनगर यांच्या नावाने मुंबई-बंगळुरू राष्ट्रीय महामार्गावरील संबंधित कनेक्टिंग लिंकचे नामकरण करण्याची मागणी यापूर्वीपासून करण्यात येत आहे. या मागणीसंदर्भात विविध स्तरांवर पाठपुरावा झाला असून शासनानेही त्याची दखल घेतल्याचे निवेदनात नमूद करण्यात आले आहे. त्यामुळे नामकरणाची प्रशासकीय प्रक्रिया पूर्ण करून अधिकृत अधिसूचना तातडीने काढावी, अशी मागणी करण्यात आली आहे.
अहिल्यादेवींच्या कार्याचा गौरव व्हावा, या भावनेतून मुंबईतील ऐतिहासिक चर्चगेट रेल्वे स्थानकाला पुण्यश्लोक अहिल्यादेवी होळकर यांचे नाव देण्याची मागणी करण्यात आली आहे. लोककल्याणकारी राज्यकारभार, सामाजिक समता, महिला सक्षमीकरण आणि जनहितासाठी अहिल्यादेवींनी केलेल्या कार्याचे स्मरण आणि सन्मान म्हणून हे नामकरण करण्यात यावे, अशी भूमिका निवेदनातून मांडण्यात आली आहे.
बाळूमामा देवस्थानच्या व्यवहारांची चौकशी करण्याची मागणी
दरम्यान, लाखो भाविकांचे श्रद्धास्थान असलेल्या श्री संत बाळूमामा देवस्थान ट्रस्टच्या आर्थिक व्यवहारांबाबत कथित गैरव्यवहार व अनियमिततेचे आरोप झाल्याचा उल्लेख निवेदनात करण्यात आला आहे. या पार्श्वभूमीवर भाविकांचा विश्वास कायम राहण्यासाठी प्रकरणाची निष्पक्ष, पारदर्शक आणि वेळबद्ध उच्चस्तरीय चौकशी एसआयटीमार्फत करावी. चौकशीत दोषी आढळणाऱ्यांवर कायदेशीर कारवाई करावी, तसेच देवस्थानच्या आर्थिक व्यवहारांचे स्पेशल ऑडिट किंवा फॉरेन्सिक ऑडिट करावे, अशी मागणी करण्यात आली आहे.
याशिवाय, श्री करवीर निवासिनी अंबामाता महालक्ष्मी देवस्थानासाठी स्वतंत्र कायदा करावा किंवा पंढरपूर व शिर्डी देवस्थानांच्या धर्तीवर सक्षम, पारदर्शक आणि भाविककेंद्रित देवस्थान कायदा करण्यात यावा, अशी मागणीही निवेदनात करण्यात आली आहे.
श्रद्धा, सामाजिक अस्मिता आणि ऐतिहासिक वारशाशी निगडित या मागण्यांकडे शासनाने गांभीर्याने पाहून सकारात्मक निर्णय घ्यावा, अशी अपेक्षा निवेदनाद्वारे व्यक्त करण्यात आली आहे. विविध मागण्यांबाबत तातडीने प्रशासकीय कार्यवाही करून शासनस्तरावर निर्णय घेण्याची मागणी धनगर समाजाच्या वतीने करण्यात आली आहे.
