दौंड, ता. २४ : दौंड नगरपरिषद कार्यालयात एका महिला अधिकाऱ्याला अश्लील शिवीगाळ करून शासकीय कामात अडथळा निर्माण केल्याप्रकरणी गब्बर वाल्मीकी याच्याविरुद्ध दौंड पोलीस ठाण्यात गुन्हा दाखल करण्यात आला आहे. या घटनेमुळे नगरपरिषद परिसरात खळबळ उडाली आहे.
पोलिसांनी दिलेल्या माहितीनुसार, दौंड नगरपरिषद कार्यालयात संबंधित महिला अधिकारी आपल्या सहकाऱ्यांच्या केबिनजवळ उभ्या असताना गब्बर वाल्मीकी (पूर्ण नाव व पत्ता अपूर्ण) हा २२ जून रोजी दुपारी दोन वाजण्याच्या सुमारास तेथे आला. त्याने अश्लील हावभाव करत शिवीगाळ केली. तसेच महिला अधिकाऱ्यांबाबत अपमानास्पद वक्तव्य करून त्यांचे मन दुखावले.
यावेळी आरोपीने “ती येथे कशी काम करते ते पाहून घेतो, येथे कोणीही काम करू देणार नाही,” अशी धमकी देत शासकीय कामकाजात अडथळा निर्माण केल्याचा आरोप फिर्यादीत करण्यात आला आहे. या प्रकरणी महिला अधिकाऱ्यांच्या तक्रारीवरून भारतीय न्याय संहिता (बीएनएस) २०२३ मधील कलम ७४, ७९, १२६, १३२, २२१, २२४, २९६, ३५१(२) आणि ३५२ अन्वये गुन्हा दाखल करण्यात आला आहे. घटनेचा पुढील तपास पोलीस हवालदार शेख करीत आहेत.
