लोणी काळभोर, ता. 15 : कदमवाकवस्ती (ता. हवेली) येथील पठारे वस्ती परिसरात सेंटरिंगचे काम करणाऱ्या एका मजुराने राहत्या घरात गळफास घेऊन आत्महत्या केल्याची धक्कादायक घटना उघडकीस आली आहे. शनिवारी (ता. 14) सकाळी सुमारे नऊच्या सुमारास ही घटना समोर आली. या आत्महत्येमागील नेमके कारण अद्याप स्पष्ट झालेले नसल्याने परिसरात विविध चर्चांना उधाण आले आहे.
जितेंद्र गोविंद मात्रे (वय 41) असे आत्महत्या केलेल्या मजुराचे नाव आहे. पोलिसांनी दिलेल्या माहितीनुसार, जितेंद्र मात्रे हे विवाहित असून त्यांना दोन मुले आहेत. ते बांधकाम क्षेत्रात सेंटरिंगचे काम करून कुटुंबाचा उदरनिर्वाह करत होते. मात्र त्यांना दारूचे व्यसन होते. यामुळे त्यांच्या कुटुंबात वारंवार वाद होत होते. या सततच्या वादामुळे कंटाळून त्यांची पत्नी वर्षभरापूर्वी दोन मुलांना घेऊन माहेरी निघून गेली होती. त्यानंतर जितेंद्र मात्रे हे घरात एकटेच राहत होते.
शनिवारी सकाळी त्यांच्या घराचा दरवाजा आतून बंद असल्याचे शेजाऱ्यांच्या निदर्शनास आले. त्यांनी आवाज देऊन तसेच दरवाजा ठोठावून पाहिले, मात्र आतून कोणताही प्रतिसाद मिळाला नाही. संशय आल्याने स्थानिक नागरिकांनी याबाबत लोणी काळभोर पोलिसांना माहिती दिली.
या घटनेची माहिती मिळताच, सहाय्यक पोलीस निरीक्षक अंकुश बोराटे, पोलीस हवालदार महेश करे व सहकारी तातडीने घटनास्थळी दाखल झाले. पोलिसांनी नागरिकांच्या मदतीने घराचा दरवाजा तोडून आत प्रवेश केला असता जितेंद्र मात्रे हे साडीच्या साहाय्याने अँगलला गळफास घेतलेल्या अवस्थेत लटकलेले आढळून आले. पोलिसांनी त्यांना तत्काळ लोणी काळभोर येथील एका खाजगी रुग्णालयात दाखल केले. मात्र डॉक्टरांनी तपासणी करून उपचारापूर्वीच त्यांचा मृत्यू झाल्याचे घोषित केले.
दरम्यान, लोणी काळभोर पोलिसांनी मृतदेह ताब्यात घेऊन शवविच्छेदनासाठी पुण्यातील रुग्णालयात पाठविला आहे. शवविच्छेदन अहवालानंतर आत्महत्येचे नेमके कारण स्पष्ट होणार असल्याचे पोलिसांनी सांगितले. या घटनेचा पुढील तपास वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस हवालदार महेश करे करत आहेत.
