कर्नाटक : कर्नाटकातील चित्रदुर्ग जिल्ह्यात भीषण अपघाताची (Karanataka Chitradurga Accident) घटना घडली असून कार आणि ट्रकच्या धडकेत तीन पोलिसउपनिरीक्षकांचा जागीच मृत्यू झाला आहे. तर दोन पोलिस अधिकारी गंभीर जखमी झाले असून त्यांच्यावर रुग्णालयात उपचार सुरू आहेत. ही दुर्घटना आज सकाळी चित्रदुर्ग जिल्ह्यातील होसदुर्गा तालुक्यातील हेगेरे परिसरात घडली. या घटनेनंतर परिसरात हळहळ व्यक्त केली जात आहे.
मिळालेल्या माहितीनुसार, पाच पोलिस अधिकारी बेंगळुरूहून बल्लारी येथे एका कार्यक्रमासाठी कारने जात होते. दरम्यान, चित्रदुर्ग जिल्ह्यातील होसदुर्गा तालुक्यातील हेगेरे परिसरात त्यांच्या कारची रस्त्याच्या कडेला उभ्या असलेल्या ट्रकला जोरदार धडक बसली. धडक इतकी भीषण होती की कारचा पुढील भाग पूर्णपणे चुराडा झाला आणि या अपघातात तिघा पोलिस अधिकाऱ्यांचा जागीच मृत्यू झाला. तर इतर दोन अधिकारी गंभीर जखमी झाले.
या दुर्घटनेत मृत्यू झालेल्या अधिकाऱ्यांची ओळख मंजुनाथ, अंबरीश आणि सचिन अशी पटली आहे. हे तिघेही आरएसआय पदावर कार्यरत होते. तर एसआय ईश्वर आणि आरएसआय महांतेश हे दोघे गंभीर जखमी झाले असून त्यांना तातडीने जवळच्या रुग्णालयात दाखल करण्यात आले आहे. डॉक्टरांकडून त्यांच्यावर उपचार सुरू असून त्यांची प्रकृती चिंताजनक असल्याचे सांगितले जात आहे.
विशेष म्हणजे अपघातात सापडलेले हे पाचही अधिकारी नुकतेच पोलीस दलात भरती झाले होते. त्यामुळे या घटनेने पोलिस दलासह त्यांच्या कुटुंबीयांवर शोककळा पसरली आहे. अचानक घडलेल्या या दुर्घटनेमुळे त्यांच्या कुटुंबियांवर दुःखाचा डोंगर कोसळला असून सहकाऱ्यांमध्येही हळहळ व्यक्त केली जात आहे.
दरम्यान, अपघाताची माहिती मिळताच चित्रदुर्ग जिल्ह्याचे पोलिस अधीक्षक रणजित बंडारू आणि आयमंगला पोलीस ठाण्याचे कर्मचारी घटनास्थळी दाखल झाले. त्यांनी घटनास्थळाची पाहणी करून तपास सुरू केला आहे. या प्रकरणी गुन्हा दाखल करण्यात आला असून अपघात नेमका कसा घडला याचा पुढील तपास पोलीस करत आहेत.
