उरुळी कांचन, (पुणे) : भाडेकरूंची कोणतीही माहिती पोलिसांना न देता जिल्हाधिकाऱ्यांच्या प्रतिबंधात्मक आदेशाची पायमल्ली करणाऱ्या दोन घरमालकांवर उरुळी कांचन पोलीस ठाण्यात गुन्हे दाखल करण्यात आले आहेत. कोरेगाव मूळ (ता. हवेली) येथील ‘कंचन वृंदावन सोसायटी’ परिसरात दहशतवाद विरोधी पथक व उरुळी कांचन पोलिसांनी ही कारवाई केली.
याबाबात दहशतवाद विरोधी शाखा पुणे ग्रामीणचे पोलीस उपनिरीक्षक महेश वसंत गायकवाड यांनी फिर्याद दिली. त्यानुसार अतुल आनंद कुलकर्णी रा. मुक्ता रेसिडेन्सि, कोथरूड पुणे) व सुरेश कृष्णाजीराव नाझरे (रा. कंचन वृंदावन सोसायटी, कोरेगाव मूळ, ता. हवेली) यांच्यावर गुन्हे दाखल करण्यात आले आहेत.
पोलिसांनी दिलेल्या माहितीनुसार, पुण्याचे जिल्हाधिकारी यांनी भारतीय नागरिक सुरक्षा संहिता कलम 163 अन्वये विशेष आदेश जारी केले आहेत. या आदेशानुसार, कोणत्याही घरमालकाने आपली मालमत्ता किंवा घर भाड्याने देताना संबंधित भाडेकरूची संपूर्ण माहिती, ओळखपत्रे आणि कराराची प्रत स्थानिक पोलीस ठाण्यात जमा करणे कायदेशीररीत्या बंधनकारक आहे. परंतु अनेक घरमालक निष्काळजीपणापोटी भाडेकरूंची माहिती पोलिसांना न देताच त्यांना राहण्यास जागा देतात.
पहिल्या घटनेत बुधवारी (ता. 05) सायंकाळी सात वाजण्याच्या सुमारास एटीएस पथकाने कोरेगाव मूळ येथील कंचन वृंदावन सोसायटीत तपासणी केली. त्यावेळी घरमालक अतुल कुलकर्णी यांनी आपल्या फ्लॅटमध्ये भाडेकरू ठेवला असल्याचे आढळले; मात्र त्याची कोणतीही नोंद उरुळी कांचन पोलीस ठाण्यात केली नव्हती. त्यामुळे त्यांच्यावर विविध कलमान्वये गुन्हा दाखल करण्यात आला आहे. तपास पोलीस हवालदार गायकवाड करत आहेत.
दुसऱ्या घटनेत सायंकाळी सव्वा सात वाजण्याच्या सुमारास त्याच सोसायटीतील बिल्डिंग ए-4, फ्लॅट क्र. 106 ची तपासणी करण्यात आली. तेथील घरमालक सुरेश कृष्णाजीराव नाझरे (रा. कंचन वृंदावन सोसायटी, कोरेगाव मूळ, ता. हवेली) यांनीही भाडेकरूची माहिती पोलिसांना न देता जिल्हाधिकाऱ्यांच्या नियमांचा भंग केल्याचे निष्पन्न झाले. त्यानुसार दोघांवरहि बीएनएस कलम २२३ अंतर्गत गुन्हा दाखल करण्यात आला असून, सहाय्यक पोलीस फौजदार सस्ते या प्रकरणाचा तपास करत आहेत.
