बारामती, ता. 6 : हॉटेलमध्ये जेवणासाठी गेलेल्या व्यावसायिकावर तीन जणांनी कोयता आणि लाकडी दांडक्यांनी जीवघेणा हल्ला केल्याची घटना बारामतीतील इंदापूर रोडवरील मोतीबाग परिसरात घडली. या हल्ल्यात व्यावसायिकाच्या पोटावर, डोक्यावर, हातावर, पाठीवर आणि डोळ्यावर दुखापत झाली असून, याप्रकरणी बारामती शहर पोलिस ठाण्यात तिघांविरुद्ध गुन्हा दाखल करण्यात आला आहे.
दरम्यान, याबाबत मज्जीत दामोदर राज्य (वय 31 , रा. तांबेनगर, बारामती) यांनी बारामती शहर पोलिस फिर्याद दिली आहे. त्यानुसार तिघांवर गुन्हा दाखल करण्यात आला आहे. पोलिसांनी दिलेल्या माहितीनुसार, राज्य हे ॲश विटा तसेच कृष्णा डेअरी फार्मचा व्यवसाय करतात. ते मित्रांसोबत हॉटेल सृजन येथे जेवण्यासाठी 4 ऑक्टोबर रोजी रात्री साडेदहाच्या सुमारास गेले होते. जेवण झाल्यानंतर बिल देण्यासाठी काऊंटरजवळ गेले असता तोंडाला रुमाल बांधलेले तीन जण हॉटेलमध्ये शिरले. त्यातील एकाच्या हातात कोयता, तर दोघांकडे लाकडी दांडकी होती.
आरोपींनी राज्य यांना शिवीगाळ करत अचानक मारहाण करण्यास सुरुवात केली. त्यांचे मित्र तेथून पळून गेल्यानंतर तिघांनी राज्य यांना कोयता, दांडके तसेच लाथाबुक्क्यांनी मारहाण केली. कोयत्याने पोटावर वार केल्याचा, तर दांडक्याने डोके, हात, पाठ, पोट आणि डोळ्यावर मारहाण केल्याचा आरोप आहे.
हल्ल्यानंतर राज्य यांनी 112 क्रमांकावर संपर्क साधला. पोलिसांनी त्यांना उपचारासाठी सिल्व्हर ज्युबिली हॉस्पिटलमध्ये दाखल केले. उपचारानंतर त्यांनी पोलिसांत फिर्याद दिली. सीसीटीव्ही फुटेजच्या आधारे संशयितांची नावे आदेश रमेश देशमुख (पत्ता माहित नाही) गोफणे (पुर्ण नांव पत्ता माहित नाही), एम.आय.डी.सी. वंजारवाडी येथील शेतकरी राजा हा टेलचे मालक व एक अनोळखी इसम अशी समोर आल्याचे फिर्यादीत नमूद आहे. पूढील तपास पोलीस उपनिरीक्षक टेळकीकर करीत आहेत.
