पुणे : महाराष्ट्र शासनाच्या ‘मुख्यमंत्री माझी लाडकी बहीण योजने’अंतर्गत मिळणाऱ्या सप्टेंबर महिन्याच्या 1500 रुपयांच्या हप्त्याची प्रतीक्षा राज्यातील अनेक महिला करत आहेत. आज 6 ऑक्टोबर उलटूनही पैसे खात्यात जमा न झाल्याने महिलांचे लक्ष सरकारच्या पुढील निर्णयाकडे लागले आहे. दरम्यान, आज पार पडणाऱ्या राज्य मंत्रिमंडळाच्या महत्त्वाच्या बैठकीत यासंदर्भात अंतिम निर्णय होण्याची शक्यता वर्तवली जात आहे.
मंत्रालयातील माहितीनुसार, या बैठकीत राज्यातील दुष्काळी स्थितीचा आढावा घेतला जाणार आहे. त्याचसोबत, लाडकी बहीण योजनेच्या पुढील हप्त्याचे वितरण कधी आणि कसे करायचे, यावर मंत्रिमंडळात विशेष चर्चा होणार आहे.सरकारने यापूर्वी जुलै आणि ऑगस्ट महिन्याचे पैसे विविध सणांचे औचित्य साधून थेट महिलांच्या खात्यावर पाठवले होते. सध्या नवरात्रोत्सव सुरू असून लवकरच दसरा आणि दिवाळीसारखे मोठे सण येत आहेत. सणांच्या काळात गृहिणींना मोठा आर्थिक आधार मिळावा यासाठी प्रशासनाकडून नियोजन केले जात आहे.
सूत्रांच्या मते, सरकार 25 तारखेनंतर टप्प्याटप्प्याने ही रक्कम महिलांच्या खात्यात जमा करण्यास सुरुवात करू शकते.या योजनेचा मुख्य उद्देश राज्यातील महिलांना स्वावलंबी बनवणे हा आहे. त्यानुसार तब्बल 1 कोटी 66 लाख पात्र महिलांना या योजनेचा थेट फायदा मिळणार आहे. सर्व पैसे ‘डीबीटी’ प्रणालीद्वारे कोणत्याही मध्यस्थाशिवाय थेट लाभार्थी महिलांच्या बँक खात्यात वर्ग केले जातील.
दरम्यान तांत्रिक प्रक्रिया आणि सणांचे नियोजन लक्षात घेऊन लवकरच पात्र महिलांच्या खात्यात सप्टेंबर महिन्याचे पैसे जमा होतील. त्यामुळे येत्या काही दिवसांत महिलांना दिलासा देणारी अधिकृत घोषणा सरकारकडून केली जाऊ शकते.
