पुणे : पुणे शिक्षक मतदारसंघाच्या निवडणुकीवरून महायुतीमध्ये उमेदवारीचा मोठा तिढा निर्माण झाला आहे. अर्ज भरण्याच्या अंतिम दिवशी भारतीय जनता पक्ष आणि शिवसेना या दोन्ही पक्षांनी आपापले उमेदवार निवडणुकीच्या मैदानात उतरवल्यामुळे राजकीय वर्तुळात उलट-सुलट चर्चा सुरू झाल्या आहेत.
भाजपकडून या जागेसाठी कौस्तुभ गावडे यांना अधिकृत उमेदवारी देण्यात आली आहे, तर दुसरीकडे शिवसेनेने मंगेश चिवटे यांना एबी फॉर्म देवून अर्ज भरण्यास पाठवले आहे. त्यामुळे एकाच जागेवर मित्रपक्षांचे दोन वेगवेगळे उमेदवार समोरासमोर आल्याने महायुतीतील समन्वयावर प्रश्न उपस्थित केले जात आहेत.
या पार्श्वभूमीवर उपमुख्यमंत्री एकनाथ शिंदे यांनी आपली भूमिका स्पष्ट केली. “मुख्यमंत्री आणि उपमुख्यमंत्री सुनेत्रा पवार यांच्यासोबत झालेल्या बैठकीत पुणे शिक्षक मतदारसंघ शिवसेनेच्या वाट्याला देण्याचे ठरले होते. तसेच मंगेश चिवटे हेच महायुतीचे संयुक्त उमेदवार असतील यावर आमचे मतैक्य झाले होते,” असा दावा शिंदे यांनी केला.
दुसरीकडे, अर्ज दाखल करण्यासाठी निघालेले शिवसेनेचे उमेदवार मंगेश चिवटे यांनीही भाजप उमेदवाराच्या माघारीबद्दल आशा व्यक्त केली आहे. ते म्हणाले, “उमेदवारी अर्ज मागे घेण्यासाठी अजून 2 ते 3 दिवसांचा अवधी शिल्लक आहे. या कालावधीत महायुतीच्या वरिष्ठ नेत्यांची बैठक होऊन सर्व प्रश्न सुटतील. भाजप आपले उमेदवार कौस्तुभ गावडे यांचा अर्ज मागे घेईल आणि महायुतीचा उमेदवार म्हणून मलाच पूर्ण पाठिंबा देईल, असा मला ठाम विश्वास आहे.”
सध्या तरी दोन्ही पक्षांनी आपापले अर्ज सादर केल्यामुळे ही जागा वादाच्या भोवऱ्यात सापडली आहे. आगामी काही दिवसांत महायुतीतील मतभेद मिटून एकच उमेदवार कायम राहतो की भाजप आणि शिवसेना यांच्यात मैत्रीपूर्ण लढत पाहायला मिळते, याकडे संपूर्ण राज्याचे लक्ष लागले आहे.
