मुंबई: बोरिवली पोलीस ठाण्यात कार्यरत असलेल्या एका पोलीस उपनिरीक्षकाला लाच स्वीकारताना लाचलुचपत प्रतिबंधक विभागाने (ACB) पकडले आहे. PSI ज्ञानेश्वर पराडे असे कारवाई झालेल्या अधिकाऱ्याचे नाव आहे. या प्रकरणामुळे बोरिवली पोलीस ठाण्यात खळबळ उडाली आहे.
तक्रारदार आणि त्यांच्या दोन बहिणींना अटक न करण्यासाठी ज्ञानेश्वर पराडे यांनी पैशांची मागणी केल्याचा आरोप आहे. सुरुवातीला 1 लाख 50 हजार रुपयांची लाच मागितल्याचे तक्रारीत नमूद करण्यात आले. त्यानंतर तडजोड झाल्यानंतर 1 लाख 30 हजार रुपये स्वीकारण्याचे ठरल्याची माहिती समोर आली आहे.
या लाचेच्या मागणीविरोधात तक्रारदाराने 29 सप्टेंबर रोजी ACBकडे धाव घेतली. तक्रार मिळाल्यानंतर अधिकाऱ्यांनी संपूर्ण प्रकरणाची प्राथमिक पडताळणी केली. 30 सप्टेंबर रोजी लाचेची मागणी झाल्याचे पडताळणीत निष्पन्न झाल्यानंतर ACBने पुढील कारवाईची तयारी केली.
यानंतर 5 ऑक्टोबर रोजी बोरिवली परिसरात सापळा लावण्यात आला. ठरल्याप्रमाणे लाचेची रक्कम स्वीकारताना PSI ज्ञानेश्वर पराडे यांना ACBच्या पथकाने रंगेहात ताब्यात घेतले. कारवाईदरम्यान त्यांचा मोबाईल फोनही जप्त करण्यात आल्याची माहिती आहे.
दरम्यान, पराडे यांच्या घराची झडती घेण्याची कारवाईही सुरू करण्यात आली. या प्रकरणात भ्रष्टाचार प्रतिबंधक कायद्याच्या कलम 7 अंतर्गत गुन्हा दाखल करण्याची प्रक्रिया सुरू असल्याचे सांगण्यात आले आहे. ACBकडून प्रकरणाचा पुढील तपास केला जात आहे.
