इंदापूर : उजनी जलाशयाच्या पात्रातून विनापरवाना वाळू उत्खनन करणाऱ्या तीन बोटी महसूल विभागाच्या पथकाने कारवाई करून जिलेटिनच्या साह्याने नष्ट करत जलाशयातच जलसमाधी दिल्या. माळवाडी (ता. इंदापूर) परिसरात झालेल्या या कारवाईत अवैध वाळू उपशासाठी वापरण्यात येणारा लाखो रुपयांचा मुद्देमाल नष्ट करण्यात आला.
उजनी जलाशयाच्या पात्रातून विनापरवाना वाळू उत्खनन व वाहतूक होत असल्याच्या पार्श्वभूमीवर महसूल विभागाने कारवाईची मोहीम हाती घेतली आहे. त्याचाच एक भाग म्हणून माळवाडी परिसरात महसूल पथकाने पाहणी केली असता अवैध वाळू उत्खननासाठी वापरण्यात येणाऱ्या तीन बोटी आढळून आल्या. पथकाने तत्काळ कारवाई करत या बोटी जिलेटिनच्या साह्याने उद्ध्वस्त करून जलाशयातच बुडविल्या.
या कारवाईमुळे उजनी जलाशयाच्या पात्रात अवैध वाळू उत्खनन करणाऱ्यांमध्ये खळबळ उडाली आहे. बोटींच्या माध्यमातून मोठ्या प्रमाणावर वाळू उपसा होत असल्याच्या तक्रारींच्या पार्श्वभूमीवर महसूल विभागाने केलेल्या कारवाईचे परिसरातून स्वागत होत आहे. अवैध वाळू उपसा रोखण्यासाठी अशाच प्रकारे सातत्याने कठोर कारवाई करावी, अशी मागणी नागरिकांकडून होत आहे.
बारामतीचे उपविभागीय अधिकारी उत्तम दिघे, तहसीलदार जीवन बनसोडे व नायब तहसीलदार स्वाती राऊत यांच्या मार्गदर्शनाखाली ही कारवाई करण्यात आली.
या कारवाईत इंदापूर महसूल पथकातील मंडळ अधिकारी पांडुरंग कोळगे, माळवाडीचे मंडळ अधिकारी औदुंबर शिंदे, ग्राममहसूल अधिकारी अशोक पोळ, वैभव मुळे, भास्कर घोळवे तसेच पोलीस पाटील अरुण कांबळे व सुनील राऊत यांनी सहभाग घेतला.
