पुणे: पुणेकर आणि हिंजवडीतील आयटी कर्मचाऱ्यांसाठी महत्त्वाची बातमी समोर आली आहे. माण ते जिल्हा न्यायालय या संपूर्ण मार्गावर मेट्रो सेवा सुरू करण्याचे नियोजन अखेर करण्यात आले आहे. सुरुवातीला केवळ 12 स्थानकांपर्यंत सेवा सुरू करण्याचा विचार होता. मात्र आता पहिल्या टप्प्यातच 17 स्थानकांवर मेट्रो धावणार आहे.
हिंजवडी आयटी पार्कला पुण्याच्या मध्यवर्ती भागाशी जोडणाऱ्या या मेट्रोची पुणेकर आतुरतेने वाट पाहत आहेत. माण ते आर. के. लक्ष्मण संग्रहालय, बालेवाडी या 12 स्थानकांच्या मार्गाला मेट्रो रेल्वे सुरक्षा आयुक्तांकडून प्रवासी सेवा सुरू करण्याची मंजुरी यापूर्वीच मिळाली आहे. त्यानंतर आणखी 5 स्थानकांचे काम पूर्ण झाले असून, या स्थानकांची सुरक्षा तपासणी पुढील आठवड्यात होण्याची शक्यता आहे. या मेट्रो सेवेचे उद्घाटन पंतप्रधान नरेंद्र मोदी यांच्या हस्ते ऑनलाइन पद्धतीने करण्याचे नियोजन आले असून मेट्रो याच महिन्यात सुरु होण्याची शक्यता आहे.
माणपासून जिल्हा न्यायालयापर्यंत सुरू होणाऱ्या 17 स्थानकांमध्ये माण, एमआयडीसी सर्कल, माण बस डेपो, हिंजवडी फेज-2 सर्कल 2, हिंजवडी फेज-2 सर्कल 1, पद्मभूषण चौक, छत्रपती शिवाजी महाराज चौक, हिंजवडी फेज-1, वाकड चौक, शिवछत्रपती क्रीडा संकुल, मिटकॉन बालेवाडी, आर. के. लक्ष्मण संग्रहालय, औंध, सकाळनगर, सावित्रीबाई फुले पुणे विद्यापीठ, कृषी महाविद्यालय आणि जिल्हा न्यायालय यांचा समावेश आहे.
सध्या हिंजवडी आणि पुणे शहरादरम्यानच्या प्रवासासाठी दीड ते दोन तास लागू शकतात. मेट्रो सुरू झाल्यानंतर हा प्रवास सुमारे 45 मिनिटांत पूर्ण होण्याची अपेक्षा आहे. उर्वरित 6 स्थानकांची कामे पूर्ण करून डिसेंबरअखेरपर्यंत संपूर्ण मार्ग सुरू करण्याचे नियोजन असल्याचे पीएमआरडीएकडून सांगण्यात आले आहे.
