दौंड: कोविड काळात बंद पडलेले दौंड येथील उपप्रादेशिक परिवहन कार्यालयाचे (RTO) वाहन परवाना शिबीर (कॅम्प) पुन्हा सुरू होण्याची शक्यता निर्माण झाली आहे. आमदार राहुल कुल यांनी मुंबईत राज्याचे परिवहन मंत्री प्रताप सरनाईक यांची भेट घेऊन हे शिबीर तातडीने पूर्ववत सुरु करण्याची मागणी केली आहे. यावर परिवहन मंत्र्यांनी सकारात्मक प्रतिसाद देत, हा कॅम्प लवकरच नियमित सुरू करण्याचे आश्वासन दिले आहे.
कोरोना महामारीच्या काळात गर्दी टाळण्यासाठी परिवहन विभागाने ग्रामीण आणि निमशहरी भागांतील लायसन्स शिबिरे तात्पुरती बंद केली होती. परिणामी, दौंड शहर आणि तालुक्यातील नागरिक साध्या ड्रायव्हिंग लायसन्ससाठी किंवा वाहन पासिंगसाठी तब्बल ४० ते ५० किलोमीटर दूर बारामती आरटीओ कार्यालयात फेऱ्या माराव्या लागत आहेत.
आमदार राहुल कुल यांनी सांगितले की, ड्रायव्हिंग लायसन्स (वाहन परवाना) व आरटीओ संबंधित इतर कामांसाठी सध्या लांबचा प्रवास करून बारामती येथे जावे लागत आहे. वाहन परवाना शिबीरमुळे काम गावातच होत होते.
दरम्यान, बारामतीला जाण्या-येण्यात ग्रामीण भागातील तरुणांचा पूर्ण दिवस वाया जातो, तसेच आर्थिक भुर्दंड सोसावा लागतो. स्थानिक पातळीवर शिबीर सुरू झाल्यास एजंटांची मध्यस्थी थांबेल आणि पारदर्शक पद्धतीने कामे होतील.
