विशाल शिंदे
भोर : भोर तालुक्यातील नसरापूर गावात जिल्हा (Bhor Crime) परिषद शाळेच्या परिसरात घडलेल्या मारहाणीच्या घटनेमुळे गावात संतापाचे वातावरण निर्माण झाले आहे. या घटनेनंतर (Bhor News) स्थानिक नागरिकांनी संबंधित व्यक्तीवर कठोर कारवाई करून कायमस्वरूपी बंदोबस्त करण्याची मागणी पोलीस प्रशासनाकडे केली आहे. (Pune Crime)
मिळालेल्या माहितीनुसार, नसरापूर येथील रहिवासी किशोर चंद्रकांत पवार (वय ३२) हे आपल्या भाचा रुद्र याला शाळेत सोडण्यासाठी सकाळच्या सुमारास जिल्हा परिषद शाळेत गेले होते. त्यावेळी शाळेच्या कार्यालयीन कक्षाजवळ मंगेश हणुमंत शिंदे (रा. नायगाव, ता. भोर) याच्याशी त्यांची बोलाचाली झाली. आपल्या भाच्याला शिवीगाळ का केली, अशी विचारणा केल्यावर आरोपी संतापून गेला.
यावेळी आरोपीने काठीने मारहाण करत फिर्यादीच्या डाव्या खांद्यावर चावा घेतला तसेच शिवीगाळ व दमदाटी केल्याची माहिती समोर आली आहे. शाळेसारख्या संवेदनशील ठिकाणी घडलेल्या या घटनेमुळे पालक व ग्रामस्थांमध्ये भीतीचे वातावरण निर्माण झाले.
स्थानिक नागरिकांच्या म्हणण्यानुसार, संबंधित व्यक्ती यापूर्वीही अनेक वेळा गावातील नागरिकांना त्रास देत असल्याच्या तक्रारी आहेत. तसेच तो यापूर्वी येरवडा कारागृहातही जाऊन आल्याची चर्चा गावात होत असून त्याच्या वागणुकीमुळे नागरिकांमध्ये नाराजी वाढत आहे.
नसरापूरसह परिसरातील गावांतील नागरिक आता या प्रकाराला कंटाळले असून, अशा प्रकारच्या घटना पुन्हा घडू नयेत यासाठी पोलीस प्रशासनाने संबंधित व्यक्तीवर कठोर आणि कायमस्वरूपी बंदोबस्त करावा, अशी मागणी ग्रामस्थांकडून केली जात आहे. गावात शांतता व सुरक्षितता राखण्यासाठी प्रशासनाने ठोस पावले उचलावीत, अशी अपेक्षाही नागरिकांनी व्यक्त केली आहे. दरम्यान, या घटनेमुळे नसरापूर परिसरात काही काळ तणावाचे वातावरण निर्माण झाले असून पुढील घडामोडीकडे स्थानिकांचे लक्ष लागले आहे.
