Suicide News: पंढरपूर : मंगळवेढा तालुक्यातील एका नवविवाहितेने विहिरीत उडी मारून आत्महत्या (Suicide) केल्याची घटना समोर आली असून या प्रकरणी पती आणि सासू-सासऱ्यांविरुद्ध आत्महत्येस प्रवृत्त केल्याचा गुन्हा दाखल करण्यात आला आहे. धनश्री संदीप जगताप (वय 23) असे मृत तरुणीचे नाव आहे. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, धनश्री हिचे लग्न 16 नोव्हेंबर 2025 रोजी संदीप गौतम जगताप याच्याशी पारंपरिक पद्धतीने झाले होते. लग्नानंतर ती मंगळवेढा येथे पतीसोबत राहत होती. काही दिवसांनंतर धनश्रीच्या वडिलांना सासरच्या मंडळींकडून तिच्या वागणुकीबाबत तक्रारी करण्यात आल्या. तिची तब्येत ठीक नसल्याचे सांगून उपचार सुरू करण्यास सांगण्यात आले. त्यानुसार तिच्यावर डॉक्टरांकडे उपचार सुरू होते आणि ती औषधेही नियमित घेत होती. काही दिवसांनी तिच्या तब्येतीत सुधारणा झाल्याचे सांगण्यात आले.
दरम्यान, धनश्रीच्या वडिलांच्या तक्रारीनुसार पती तसेच सासू-सासरे हे तिला वारंवार मानसिक त्रास देत होते. किरकोळ कारणांवरून टोमणे मारणे, शिवीगाळ करणे आणि अपमानास्पद बोलणे असा त्रास दिला जात असल्याचा आरोप करण्यात आला आहे. या सततच्या त्रासामुळे धनश्री मानसिक तणावात होती, असेही फिर्यादीत नमूद करण्यात आले आहे.
4 मार्च 2026 रोजी सकाळी धनश्री हिला शेतात नेण्यात आले होते. त्यानंतर काही वेळातच ती दिसत नसल्याची माहिती तिच्या कुटुंबीयांना देण्यात आली. पुढे शोध घेतला असता धनश्रीने शेतातील विहिरीत उडी मारून आत्महत्या केल्याचे समोर आले.
या प्रकरणी धनश्रीचे वडील आप्पासाहेब मोरे यांनी मंगळवेढा पोलीस ठाण्यात फिर्याद दिली आहे. त्यानुसार पती संदीप जगताप तसेच सासू-सासऱ्यांविरुद्ध भारतीय न्यायसंहिता कलम 108 अंतर्गत गुन्हा दाखल करण्यात आला आहे. पोलिसांनी पतीला अटक केली असून पुढील तपास सुरू आहे.
