पुणे : डीजे आणि कर्कश ध्वनिवर्धकांच्या त्रासाविरोधात पुण्यातील नागरिकांनी रस्त्यावर उतरून विरोध केला आहे. रविवारी शेकडो पुणेकरांनी एकत्र येत डीजे बंदीची मागणी केली. सोलापूर, मुंबई आणि नागपूरसारख्या शहरांमध्ये डीजेवर निर्बंध लागू होऊ शकतात, तर पुण्यातही अशी कारवाई का केली जात नाही, असा सवाल नागरिकांनी उपस्थित केला.
जंगली महाराज रस्त्यावरील झाशीची राणी लक्ष्मीबाई चौकापासून महानगरपालिकेपर्यंत मोर्चा काढण्यात आला. ‘लाउड स्पीकरविरोधी पुणेकर मंच’च्या आवाहनाला प्रतिसाद देत विविध भागांतील नागरिक या आंदोलनात सहभागी झाले. सर्व धर्मांच्या तसेच राजकीय आणि सार्वजनिक उत्सवांमध्ये मोठ्या आवाजातील ध्वनिवर्धकांवर नियंत्रण आणावे, अशी मागणी यावेळी करण्यात आली.
मोर्चादरम्यान नागरिकांनी डीजेविरोधात जोरदार घोषणाबाजी केली. ‘डीजेबंदी झालीच पाहिजे’ आणि ‘शांतता आमचा हक्क आहे’, अशा घोषणा देत नागरिकांनी प्रशासनाचे लक्ष वेधले. ढोल-ताशा पथकांचे वादनही सर्वोच्च न्यायालयाने ठरवून दिलेल्या ध्वनीमर्यादेतच व्हावे, अशी मागणी आंदोलकांनी केली.
या आंदोलनाच्या पार्श्वभूमीवर विद्यानंद बापट यांचे नावही चर्चेत आले आहे. सार्वजनिक उत्सवांमधील मोठ्या आवाजाविरोधात भूमिका घेतल्यानंतर बापट यांना एका तरुणाने मारहाण केली होती. त्यामुळे सुरक्षेच्या कारणास्तव ते रविवारीच्या मोर्चात सहभागी झाले नाहीत. मात्र, त्यांच्या डीजेबंदीच्या मागणीला नागरिकांचा वाढता पाठिंबा मिळताना दिसला.
दरम्यान, सण आणि उत्सवांमध्ये मोठ्या आवाजातील संगीत आणि डीजेच्या वापराबाबत मनसे अध्यक्ष राज ठाकरे यांनीही भाष्य केले आहे. उत्सव साजरे करण्यासाठी स्पष्ट नियमावली असण्याची गरज त्यांनी व्यक्त केली.
पुण्यातील या आंदोलनामुळे डीजे, ध्वनिवर्धक आणि सार्वजनिक उत्सवांमधील ध्वनीप्रदूषणाचा मुद्दा पुन्हा एकदा चर्चेत आला आहे. नागरिकांनी बंदीशिवाय माघार घेणार नसल्याची भूमिका घेतल्याचे दिसून येत आहे.
