मुंबई: राज्यभर चर्चेत असलेल्या MPSC औषध निरीक्षक परीक्षेच्या पेपरफुटी प्रकरणात गुन्हे शाखेचा तपास वेगाने सुरू आहे. या प्रकरणात आतापर्यंत अनेक आरोपींवर कारवाई झाली असून, तपासादरम्यान मिळालेल्या डिजिटल पुराव्यांमुळे प्रकरणाला नवी दिशा मिळाली आहे.
नंदुरबार येथून ऋतुजा पाटीलला अटक करण्यात आली असून, 2 सप्टेंबर रोजी तिला न्यायालयात हजर केले असता 3 दिवसांची पोलीस कोठडी सुनावण्यात आली. इतर आरोपींना 5 दिवसांची पोलीस कोठडी देण्यात आली आहे. पोलिसांनी आरोपींची चौकशी करून पेपरफुटीचा नेमका मार्ग आणि त्यामध्ये आणखी कोणाचा सहभाग आहे का, याचा शोध सुरू केला आहे.
या तपासात सहआरोपी लोकेश उर्फ गौरव पाटीलच्या मोबाईलमधून मिळालेल्या तब्बल 270 पानांच्या WhatsApp चॅट्स महत्त्वाचा पुरावा ठरत आहेत. ऋतुजाचा मोबाईल उल्हास नदीत फेकण्यात आल्याचा दावा आहे. त्यामुळे तिच्या मोबाईलऐवजी गौरवच्या फोनमधील संभाषण तपासासाठी महत्त्वाचे ठरले आहे.
पोलिसांच्या माहितीनुसार, 20 मार्चच्या चॅटमध्ये परीक्षेतील काही प्रश्नांबाबत चर्चा झाल्याचा दावा आहे. तसेच 22 मार्च रोजीच्या परीक्षेत दिलेल्या प्रश्नांपैकी 78 प्रश्न आले असल्याचे ऋतुजाने सांगितल्याचा तपास यंत्रणेचा दावा आहे. आणखी 13 प्रश्न सोडवल्याने एकूण 91 प्रश्न सोडवल्याचा उल्लेख चॅटमध्ये असल्याचेही समोर आले आहे. पेपरसाठी 5 लाख रुपयांची मागणी झाल्याचाही उल्लेख संभाषणात असल्याचे पोलिसांचे म्हणणे आहे.
दरम्यान, MPSC अधिकारी विश्वेश्वर नकाते याने गुन्ह्यात वापरलेला लॅपटॉप खाडीत फेकल्याचे तपासात समोर आले आहे. या लॅपटॉपमध्ये 294 प्रश्न आणि त्यांचे पर्याय असल्याचा दावा पोलिसांनी केला आहे. पोलिसांनी लॅपटॉप शोधून काढला असून त्यातील माहिती मिळवण्याचे प्रयत्न सुरू आहेत.
नंदुरबारमधील कौटिल्या क्लासेसचे संचालक आणि आरोपी प्रवीण पाटीलच्या घरातून आर्थिक व्यवहारांशी संबंधित कागदपत्रेही मिळाल्याचे सांगण्यात आले. आरोपी तपासात सहकार्य करत नसून उडवाउडवीची उत्तरे देत असल्याचे पोलिसांनी न्यायालयात सांगितले.
या प्रकरणात मयूर ठाकरे याचाही उल्लेख चॅटमध्ये असल्याचे समोर आले आहे. त्याची भूमिका तसेच पेपरफुटीमध्ये आणखी कोण सहभागी आहे का, याचा तपास गुन्हे शाखेकडून सुरू आहे.
