बारामती: महाराष्ट्राचे उपमुख्यमंत्री अजित पवार (Ajit Pawar) यांच्या निधनाने राजकारणातील एका झंझावाती पर्वाचा अंत झाला आहे. मुंबईहून बारामतीच्या दिशेने निघालेले ‘लिअरजेट ४५’ हे चार्टर्ड विमान लँडिंगच्या अवघ्या काही सेकंद आधी कोसळलं. सकाळी ८.४५ च्या सुमारास घडलेल्या या घटनेने संपूर्ण देश सुन्न झाला आहे.
मुंबईहून उड्डाण केल्यानंतर सर्व काही सुरळीत होते. मात्र, बारामतीच्या आकाशात पोहोचताच दाट धुके आणि अत्यंत कमी दृश्यमानतेने वैमानिकांसमोर आव्हान उभे केले. बारामती विमानतळ हे लहान असून तिथे ‘इन्स्ट्रुमेंट लँडिंग सिस्टम’ (ILS) उपलब्ध नाही, त्यामुळे सर्वस्वी ‘मॅन्युअल लँडिंग’वर अवलंबून राहावे लागते.
वैमानिकाने लँडिंगचा पहिला प्रयत्न अयशस्वी ठरल्याने विमान पुन्हा हवेत घेतले. दुसऱ्या प्रयत्नावेळी विमानाने ‘मे-डे’ (Mayday) हा आणीबाणीचा संदेश दिला, पण अवघ्या १०० फूट उंचीवर असताना विमानाचा तोल गेला आणि ते धावपट्टीच्या बाजूला जमिनीवर आदळले. मोठा स्फोट होऊन विमानाने पेट घेतल्याने कोणालाही वाचवण्याची संधी उरली नाही.
तपास यंत्रणांच्या हाती आता विमानाचा ‘ब्लॅक बॉक्स’ लागला असून, तो या गूढ अपघाताचे रहस्य उलगडणार आहे. यात विमानाचा वेग, इंजिनची स्थिती आणि उंचीची तांत्रिक माहिती दडलेली असते. यात वैमानिकांचे एकमेकांशी झालेले संभाषण आणि एअर ट्रॅफिक कंट्रोलरशी (ATC) झालेला संवाद रेकॉर्ड असतो. यातून मानवी चूक होती की तांत्रिक बिघाड, हे स्पष्ट होईल.
