पुणे: पुण्यातील नवले पूल परिसरात पुन्हा एकदा भीषण अपघाताची घटना समोर आली आहे. भूमकर पुलावर मालवाहू ट्रकचा अपघात झाल्याने परिसरात काही काळ गोंधळाचे वातावरण निर्माण झाले. प्राथमिक माहितीनुसार, एका ट्रकचे ब्रेक निकामी झाल्याने चालकाचे वाहनावरील नियंत्रण सुटले आणि ट्रक समोरून जाणाऱ्या दुसऱ्या ट्रकवर जाऊन आदळला. त्यानंतर मागून येणारे आणखी 3 ट्रक एकमेकांवर धडकले.
या अपघातात एका व्यक्तीचा जागीच मृत्यू झाल्याची प्राथमिक माहिती आहे. तसेच 3 ते 4 जण जखमी झाल्याचे समोर आले आहे. जखमींना तातडीने जवळच्या रुग्णालयात नेण्यात आले असून त्यांच्यावर उपचार सुरू आहेत. अपघातातील काही जखमींची प्रकृती गंभीर असल्याची माहिती मिळत आहे.
धडक इतकी जोरदार होती की, ट्रकच्या पुढील भागाचे मोठे नुकसान झाले. एका ट्रकच्या कॅबिनचा अक्षरशः चुराडा झाला असून त्यामध्ये एक व्यक्ती अडकली होती. अडकलेल्या व्यक्तीला बाहेर काढण्यासाठी घटनास्थळी मदतकार्य सुरू करण्यात आले. अपघाताची माहिती मिळताच पोलिसांचे पथक तातडीने घटनास्थळी पोहोचले.
अपघातानंतर परिसरातील नागरिकांनीही घटनास्थळी गर्दी केली होती. दरम्यान, नवले पूल आणि परिसरात यापूर्वीही गंभीर अपघातांच्या घटना घडल्या आहेत. त्यामुळे या मार्गावरील सुरक्षिततेचा मुद्दा पुन्हा चर्चेत आला आहे. या अपघाताचे नेमके कारण आणि इतर तपशील पोलिसांच्या तपासानंतर स्पष्ट होणार आहेत.
